Arif Əsədov: Millimiz qrupda 2-3-cü yerlər uğrunda mübarizə apara bilər
Bakı, 13 dekabr, AZƏRTAC
“Fikrimcə, yığmamız ikinci və üçüncü yerlər uğrunda Ukrayna və İslandiya ilə mübarizə apara bilər”.
Bu sözləri AZƏRTAC-a açıqlamasında veteran futbolçu Arif Əsədov 2026-cı il dünya çempionatının Avropa zonası üzrə seçmə mərhələsinin püşkü barədə danışarkən deyib.
Mütəxəssis Azərbaycan millisinin dörd komandalı qrupa düşməsinin arzuolunmaz olduğunu söyləyib: “Beş komandalı qrupa düşsəydik, bu, yaxşı nəticələr əldə edə bilməyimiz baxımından daha yaxşı olardı. Bu qrupa 4-cü səbətdən düşmüşük. O deməkdir ki, rəqiblərimiz bizdən üstündürlər. Çünki əvvəlki illərdə beş komandaları qrupa düşürdük ki, bir rəqib yığmamızdan aşağı pillədə yer alırdı. Həmin kollektivə qarşı qalib gəlmə ehtimalımız da daha yüksək olurdu. İndiki halda isə bütün rəqiblər çox təhlükəlidir”.
A.Əsədov Fransa millisinin Xorvatiyaya qalib gələrək, D qrupuna düşəcəyini və aşkar favorit olduğunu söyləyib: “Rəqiblərin gücü hər kəsə məlumdur. Xorvatiyanın Fransa qarşısında şansları azdır. Buna baxmayaraq, hər iki komanda millimiz üçün çətin rəqiblərdir. Ukraynaya gəlincə, ilk dəfədir seçmə mərhələdə qarşılaşacağıq. Daha öncə yoldaşlıq oyunlarında üz-üzə gəlmişik. Onlar da Avropa çempionatında çıxış etmiş iddialı kollektivlərdən biridir. Bundan başqa, İslandiya ilə ilk dəfə oynayacağıq. Düşünürəm ki, bu görüş hər kəsdə maraq doğuracaq”.
Qeyd edək ki, Azərbaycan millisi seçmə mərhələdə Fransa/Xorvatiya cütünün qalibi, Ukrayna və İslandiya ilə D qrupunda mübarizə aparacaq.
Bölmənin digər xəbərləri
