Arif Əsədov: “Molde” komandası “Qarabağ”dan bu performansı gözləmirdi
Bakı, 22 sentyabr, AZƏRTAC
“Qarabağ”ın sentyabrın 21-də “Molde” ilə baş tutmuş oyunu son zamanlar keçirilmiş ən yaxşı matçlarından biri idi. Qarşılaşmanın əvvəlindən sonuna qədər üstün tərəf “Qarabağ” oldu. Ağdam təmsilçisi öz oyununu rəqibə diktə etdi. Sanki rəqib bu vəziyyətə çaşbaş qalmışdı. Onlar “Qarabağ”dan bu performansı gözləmirdi.
Bu sözləri AZƏRTAC-a açıqlamasında futbol üzrə Azərbaycan milli komandasının məşqçisi Arif Əsədov UEFA Avropa Liqasının ilk turu çərçivəsində Bakıda “Qarabağ” klubunun 1:0 hesabı ilə qalib gəldiyi “Molde” komandası ilə görüş barədə danışarkən deyib.
Əlli üç yaşlı mütəxəssis bildirib ki, dünənki matçda hər kəs komanda oyununun şahidi oldu:
“Qarabağ” komandası bu matça çox yaxşı hazırlaşmışdı. Lakin Ağdam təmsilçisinin 8 nömrəli oyunçusu Marko Yankoviç bir pillə üst səviyyədə idi. Ancaq ümumilikdə komanda yaxşı oyun nümayiş etdirdi”.
O, qrup mərhələsinə qələbə ilə başlamağın komandaya böyük təkan verəcəyini vurğulayıb: “Qrupda favorit komanda Almaniyanın “Bayer Leverkusen” klubudur. İkinci yerə isə real namizəd “Molde” və “Qarabağ komandalarıdır. Qrupdan çıxmaq şansımız səfər matçına bağlıdır. Həmin matçda “Qarabağ” komandası İsveçin “Hakken” klubuna qalib gəlsə ikinci yer uğrundakı şansı artar”.
Bölmənin digər xəbərləri
