Aslan Kərimov: “Qarabağ” standart vəziyyətlər və əks-hücumlar zamanı diqqətli olmalıdır
Bakı,12 dekabr, AZƏRTAC
“Qarabağ”ın İsveç klubuna qalib gəlmək şanslarını yüksək dəyərləndirirəm”.
Bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov “Qarabağ”ın UEFA Avropa Liqasının əsas mərhələsinin VI turunda bu gecə İsveçdə “Elfsborq” klubuna qarşı keçirəcəyi oyun barədə danışarkən deyib.
Veteran futbolçu bildirib ki, bu mərhələdə zəif komanda olmur: “Hesab edirəm ki, “Elfsborq” turnirdə şansı az olan komandalardan biridir. “Roma” üzərindəki qələbə və “Braqa” ilə oyundakı heç-heçəyə nəzər yetirsək görərik ki, komanda əks-hücumlardan yaxşı istifadə edib qollar vurdu. Yəni, oyun baxımından üstünlükləri yoxdur. Amma əks-hücumlar zamanı diqqətli olmaq lazımdır. Bununla belə, “Qarabağ”ın bu gecə İsveçdən 3 xalla qayıdacağını düşünürəm. Təmsilçimiz rəqibindən üstündür. Mənə görə, “Elfsborq”un şansı 20 faizdir. Bu da onların standart vəziyyətlərdə uğurlu olması ilə bağlıdır. Ancaq arxayın şəkildə oynamaq olmaz, bu futboldur və istənilən nəticə qeydə alına bilər”.
Onun sözlərinə görə, matçın keçiriləcəyi Boras şəhərində hava şəraitinin soyuq olması və süni ot örtüyü amili komandaların oyununa ciddi təsir etməməlidir: “Hava şəraiti matçda haradasa 5 faiz özünü göstərə bilər. Lakin “Qarabağ”ın üstün oynayacağını düşünürəm. Çünki Qurban Qurbanov kollektivi daha əvvəl də İsveç klubları ilə qarşılaşıb. Bu matç da həmin oyunlardan biridir. Həmçinin rəqib azarkeşlər İngiltərə, İtaliya və İspaniya fanatları kimi çılğın görünmürlər. Bu da meydanda rahat mübarizə aparacağımıza imkan yaradır”.
Mütəxəssis zədə səbəbindən matçı buraxacaq Kevin Medinanın standart vəziyyətlər zamanı yerinin görünəcəyini vurğulayıb: “Mərkəz müdafiəçisi son oyunlarda uğurlu çıxış edir. Kolumbiyalı futbolçunun olmaması Azərbaycan çempionu üçün böyük itkidir”.
A.Kərimov “Qarabağ”ın pley-offa yüksəlmək şansının olduğunu istisna etməyib: “Düşünürəm ki, Ruminiya təmsilçisi FKSB növbəti mərhələni təmin etsə, Bakıda onları məğlub edə bilərik. Təbii ki, hər şey öz əlimizdə deyil. Digər komandaların nəticələri də önəmli olacaq. Çətin olsa da, vəziyyəti öz xeyrimizə dəyişə bilərik”.
Qeyd edək ki, dekabrın 12-dən 13-nə keçən gecə “Boras Arena”da təşkil olunacaq “Elfsborq” – “Qarabağ” oyunu Bakı vaxtı ilə saat 00:00-da start götürəcək. Aktivində 3 xalı olan Azərbaycan çempionu turnir cədvəlinin 32-ci pilləsində qərarlaşıb.
Bölmənin digər xəbərləri
