Aslan Kərimov: “Sabah” mükəmməl iş görərək, hər mərhələdə inkişaf etməyi bacardı
Bakı, 26 avqust, AZƏRTAC
Klub səviyyəsində 9 il elə də uzun müddət deyil. Bəzən yüksək mərhələlərə çatmaq üçün onilliklər tələb olunur.
Bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov “Sabah”ın UEFA Çempionlar Liqasının əsas mərhələsinə vəsiqə qazanması və qət etdiyi inkişaf yolu barədə danışarkən deyib.
Təcrübəli mütəxəssis bildirib ki, bu nailiyyət uzunmüddətli və doğru qurulmuş strategiyanın bəhrəsidir: “Hesab edirəm ki, qazanılan uğurun əsas səbəbkarlarından biri klub rəhbərliyidir. Çünki bu nailiyyəti yalnız bir məşqçinin adına yazmaq ədalətsizlik olardı. Bütün bunlar düzgün qurulmuş strategiyanın nəticəsidir. Bu uğurun ən vacib məqamlarından biri də keçilən yoldakı nöqsanları operativ şəkildə aradan qaldırmaq bacarığıdır. Mövsümün və ya çempionatın əvvəlində gördükləri çatışmazlıqları tez bir zamanda həll edə bilmələri komandanı addım-addım Çempionlar Liqasına gətirib çıxardı. Bəzi klublar buraxdıqları səhvləri görmədikləri üçün inkişafdan qalırlar. "Sabah" isə bu baxımdan mükəmməl iş görərək, hər mərhələdə inkişaf etməyi bacardı”.
Aslan Kərimovun sözlərinə görə, püşkatmada rəqibləri gördükdən sonra “Sabah”ın üstün və zəif tərəfləri, kimə qarşı necə oynaya biləcəyi barədə fikir səsləndirmək mümkün olacaq: “İstənilən halda, komandamız bu mərhələdə İngiltərə, İspaniya, Almaniya və Fransa kimi top-liqaların təmsilçiləri ilə üz-üzə gələcək. Dünyanın ən güclü klublarına qarşı mübarizə aparacaq. Hələlik nəsə demək tezdir, sadəcə bu oyunlardan zövq almaq lazımdır. Azarkeşlər bu qarşılaşmaları izləyərkən özlərini böyük futbol dünyasının bir hissəsi kimi hiss edəcəklər".
Qeyd edək ki, “Sabah” Çempionlar Liqasının pley-off mərhələsində İsrailin “Hapoel” (Beer-Sheva) klubunu iki oyunun nəticəsinə əsasən 6:4 hesabı ilə məğlub edərək liqa mərhələsinə vəsiqə qazanıb.
Bölmənin digər xəbərləri
