AŞPA-DA AZƏRBAYCANLI DEPUTATIN ÇIXIŞI MARAQ DOĞURMUŞDUR
AZƏRTAC-ın xüsusi müxbiri xəbər verir ki, Avropa Şurası Parlament Assambleyasının yay sessiyasının növbəti iş günündə Türkiyədə demokratik təsisatların fəaliyyəti, Beynəlxalq Qızıl Xaç Komitəsinin fəaliyyəti və digər məsələlər müzakirə edilmişdir.
Türkiyəyə dair məruzəçi belçikalı deputat Luk Van den Brandın və digər natiqlərin çıxışlarında son illər demokratiyanın inkişafı istiqamətində ölkədə aparılmış uğurlu siyasətə, iqtidarda olan Ədalət və İnkişaf Partiyasının fəaliyyətinə toxunulmuş, məhkəmənin bu partiyaya qarşı qaldırdığı iddialardan bəhs edilmiş, 1961-ci ildən ötən dövr ərzində məhkəmələrin 20-dən artıq partiyanın fəaliyyətini dayandırmasına dair qərarlarının demokratik dəyərlərə qarşı təzyiq vasitəsi kimi səciyyələndirilmişdir. İslam dəyərləri əsasında formalaşmış Ədalət və İnkişaf Partiyasının ölkədə diqqətəlayiq islahatlar apardığı, məhz bunun sayəsində keçirilmiş prezident seçkilərində bu partiyanın inamlı qələbə qazandığı diqqətə çatdırılmışdır.
Avropalı deputatlar partiyanın fəaliyyətini dəstəklədiklərini birmənalı şəkildə bildirmiş və ona qarşı yönəlmiş təzyiqlərə son qoyulmasını tələb etmişlər.
Beynəlxalq Qızıl Xaç Komitəsinin fəaliyyəti üzrə böyük britaniyalı deputat M.Hankokk və komitənin sədri Yakob Kellenbergerin məlumatında 1863-cü ildə yaradılmış bu qurumun fəaliyyətindən bəhs olunmuş, onun dünyanın 80 ölkəsində ofisinin və 12 min əməkdaşının silahlı münaqişə zəminində qaçqın düşmüş, zorakılığa məruz qalmış milyonlarla insana humanitar yardım göstərdiyi qeyd edilmişdir. Əsasən Belçika, Fransa, Böyük Britaniya, Danimarka, Almaniya, İtaliya, Hollandiya, Norveç, İsveç, İspaniya və İsveçrə tərəfindən maliyyələşdirilən komitənin keçmiş Yuqoslaviyada və Cənubi Qafqazda münaqişələr zamanı itkin düşmüş şəxslərin axtarışı sahəsindəki işləri yüksək qiymətləndirilmiş, qaçqın və məcburi köçkünlərə humanitar yardımı istiqamətindəki fəaliyyətinin bütün dünya, o cümlədən Avropa Şurası tərəfindən dəstəkləndiyi vurğulanmışdır.
Azərbaycan nümayəndə heyətinin üzvü Qənirə Paşayeva bu mövzu ilə bağlı çıxışında Ermənistan-Azərbaycan, Dağlıq Qarabağ münaqişəsi zamanı əsir və itkin düşmüş, girov götürülmüş şəxslərlə əlaqədar 2008-ci il aprelin 14-də Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyası ilə Beynəlxalq Qızıl Xaç Komitəsi arasında mərkəzləşdirilmiş çərçivə sazişinin bağlandığını diqqətə çatdırmışdır. Deputat Ermənistanın Azərbaycan ərazilərini işğal etməsi nəticəsində bir milyondan artıq azərbaycanlının doğma yurdundan didərgin salındığını, itkin düşmüş 4.264 nəfərdən 47-nin uşaq, 262 nəfərin qadın, 350-nin isə yaşlı adamlar olduğunu, 783 azərbaycanlının hərbi əməliyyatların gedişində erməni hərbi birləşmələri tərəfindən əsir və girov götürüldüyünü xatırlatmışdır. O bildirmişdir ki, əsir düşmüş və girov götürülmüş şəxslər barədə Azərbaycan ilə Ermənistan arasında ümümi razılıq əldə edilməsinə baxmayaraq, erməni tərəfinin beynəlxalq hüquq normalarını pozaraq əsirlikdə olan azərbaycanlılara işgəncələr verdiyini qeyd etmişdir. Q.Paşayeva bu faktların Ermənistan tərəfinin israrla inkar etməsi faktını pisləmişdir.
Azərbaycanlı deputat ölkə rəhbərliyinin gördüyü tədbirlər və Beynəlxalq Qızıl Xaç Komitəsinin səyləri nəticəsində 1.396 Azərbaycan vətəndaşının erməni əsirliyindən və girovluğundan azad olunduğunu bəyan etmişdir. Son illər aparılmış araşdırmalar nəticəsində 107 nəfərin sağ qaldığını və onların işğal altındakı ərazilərdə saxlandığını diqqətə çatdıran Q.Paşayeva, qeyri-insani münasibət üzündən əksəriyyətinin sağlamlığını itirdiyini bildirmişdir.
Deputat hələ də Azərbaycanda yüzlərlə ailənin öz doğmalarının əsirlikdən azad olunacağına böyük ümid bəslədiyini qeyd etmiş, komitənin sədrini və Assambleyanın deputatlarını itkin düşmüş və girov götürülmüş insanların taleyinə biganə qalmamağa, intizarla yaşayan ailələrə əzizlərinin qaytarılmasına yaxından kömək göstərməyə çağırmışdır.
Azərbaycanlı deputatın çıxışı maraq doğurmuş və alqışlara səbəb olmuşdur.
Sessiyanın gedişi zamanı deputatlara əsir və girov götürülmüş, itkin düşmüş insanlardan bəhs edən “Bizi əsirlikdən qurtarın!” kitabı paylanmışdır.
Bölmənin digər xəbərləri
