Astana “Wildberries” anbarlarının Qazaxıstana köçürülməsi məlumatlarını şərh edib
Astana, 29 iyul, AZƏRTAC
Qazaxıstan Ticarət və İnteqrasiya Nazirliyi “Wildberries” şirkətindən əlavə anbar tutumunun yerləşdirilməsi ilə bağlı heç bir rəsmi sorğu almayıb.
AZƏRTAC nazirliyin mətbuat xidmətinə istinadla xəbər verir ki, belə bir təklif alınarsa, o, milli maraqlar və Qazaxıstan qanunvericiliyi nəzərə alınmaqla nəzərdən keçiriləcək.
Nazirlik vurğulayıb ki, Qazaxıstan əhəmiyyətli tranzit və logistika potensialına malikdir və müasir infrastrukturun inkişafına, iş yerlərinin yaradılmasına və sərhədlərarası elektron ticarətə yönəlmiş investisiya layihələrini dəstəkləyir. Məcburi şərt bu layihələrin qarşılıqlı faydalı əsasda həyata keçirilməsi və yerli sahibkarlar üçün imkanlar yaradılmasıdır.
Ticarət Nazirliyi, həmçinin qeyd edib ki, malların daşınması və saxlanması Qazaxıstan qanunvericiliyi və Avrasiya İqtisadi İttifaqının müvafiq sənədləri ilə tənzimlənir. Bu səbəbdən müəyyən bazar iştirakçıları üçün heç bir xüsusi şərt və ya istisna nəzərdə tutulmur.
Rusiyanın bir neçə bölgəsindəki “Wildberries” bazarının anbar kompleksləri bu yaxınlarda pilotsuz uçuş aparatlarından istifadə etməklə bir sıra hücumlara məruz qalıb. Bu fonda “Kommersant” qəzeti çərşənbə günü bildirib ki, birləşmiş “Wildberries & Russ” (RWB) şirkəti Qazaxıstanda 100.000 kvadratmetrə qədər sahəyə malik anbar sahəsi axtarır.
Bölmənin digər xəbərləri
