Astarada “20 Yanvar-Azərbaycan xalqının qan yaddaşıdır” mövzusunda tədbir keçirilmişdir
Astara, 17 yanvar (AZƏRTAC). Astara şəhərindəki 1 nömrəli tam orta məktəbdə 20 Yanvar faciəsinin 23-cü ildönümünə həsr olunmuş “20 Yanvar-Azərbaycan xalqının qan yaddaşıdır” mövzusunda tədbir keçirilmişdir.
AZƏRTAC xəbər verir ki, tədbir iştirakçıları 20 Yanvar şəhidlərinin xatirəsini bir dəqiqəlik sükutla yad etmişlər.
Tədbirdə çıxış edənlər Azərbaycan xalqının tarixinə “Qanlı Yanvar” kimi daxil olmuş hadisələrdən danışmış, milli azadlıq yolunda canlarından keçmiş Vətən övladlarının öz qanları ilə xalqımızın qəhrəmanlıq salnaməsinə parlaq səhifə yazdıqlarını vurğulamışdır.
Qeyd olunmuşdur ki, xalqımızın həmin ağır günlərində ümummilli lider Heydər Əliyev çətin şəraitdə Moskvadakı Azərbaycan nümayəndəliyinə gələrək verdiyi bəyanatda qanlı hadisələri kəskin pisləmiş, totalitar sovet rejiminin antibəşəri siyasətinə qəti etirazını bildirmişdir.
Ulu öndər 1991-ci ildə Naxçıvan Ali Məclisinin sədri vəzifəsində çalışarkən bu faciəyə hüquqi-siyasi qiymət verilmişdir. Məhz onun təşəbbüsü ilə Naxçıvan Muxtar Respublikasının Ali Məclisi 1991-ci il noyabr ayının 21-də hər il yanvarın 20-si tarixinin hüzn günü kimi qeyd olunması barədə qərar qəbul etmişdir.
Azərbaycan xalqının ümummilli lideri Heydər Əliyevin Azərbaycanda hakimiyyətə qayıdışından sonra, daha dəqiq desək, 1994-cü ildə 20 Yanvar hadisələrinə siyasi və hüquqi qiymət verilmiş, qanlı cinayəti törədənlərin adları ictimaiyyətə açıqlanmışdır.
Mərasim iştirakçıları 20 Yanvar şəhidlərinin qəhrəmanlığının xalqımızın qəlbində daim yaşayacaqlarını bildirmişlər.
Tədbirin sonunda məktəblilərin ifasında 20 Yanvar faciəsi ilə bağlı ədəbi-bədii kompozisiya nümayiş etdirilmişdir.
Bölmənin digər xəbərləri
