İDMAN
ASTARALI GÜLƏŞÇİLƏR ZONA YARIŞLARININ QALİBİ OLMUŞLAR
AZƏRTAC-ın müxbiri xəbər verir ki, Lənkəran Olimpiya İdman Mərkəzində sərbəst güləş üzrə yeniyetmələrin beşinci Respublika oyunlarının zona yarışları keçirilmişdir.
Ölkəmizin 11 rayonundan gəlmiş 150-yə yaxın gənc idmançı qalib adı uğrunda mübarizə aparmışdır.
Zona yarışlarında daha inamlı oyun nümayiş etdirən Astara rayon uşaq-gənclər idman məktəbinin güləşçiləri komanda hesabında birinci yeri tutmuşlar.
Şəxsi birincilik yarışlarında astaralı idmançılardan Əjdər Mehdizadə 46 kiloqram, Samir Məmmədzadə 54 kiloqram, İlqar Ağayev 58 kiloqram, Ruhid Nəsirov 100 kiloqram çəki dərəcələrində birinci, Gündüz İmaməliyev 42 kiloqram çəki dərəcəsində ikinci və Turqut Quluzadə 42 kiloqram çəki dərəcəsində üçüncü nəticə göstərmişlər.
Qalib idmançılar may ayında Bakı şəhərində keçiriləcək final yarışlarında iştirak etməyə vəsiqə qazanmışlar.