“ATASPORT” AVROPA KLUB ÇEMPİONLARININ KUBOKU UĞRUNDA TURNİRƏ QƏLƏBƏ İLƏ BAŞLAMIŞDIR
AZƏRTAC xəbər verir ki, mayın 25-də Bakı Otüstü Xokkey Kompleksində qitənin 8 ən güclü qadın komandaları arasında 34-cü Avropa klub çempionlarının kuboku uğrunda turnirin açılışı olmuşdur.
Yarışların təntənəli açılışı mərasimində Azərbaycanın dövlət himni səsləndirilmişdir.
Tədbirdə gənclər və idman naziri Azad Rəhimov, Azərbaycan Otüstü Xokkey Federasiyasının prezidenti Fazil Məmmədov və turnirin texniki direktoru Mariana Kaymana çıxış edərək, bütün iştirakçılara uğurlar arzulamışlar.
Vurğulanmışdır ki, son illər Azərbaycanda bütün sahələrdə olduğu kimi, idmanda da böyük irəliləyiş baş vermiş, ölkəmizdə bir çox beynəlxalq yarışlar yüksək səviyyədə keçirilmişdir. Azərbaycanın qadınlardan ibarət “Atasport” otüstü xokkey komandası 2005-ci ildə Niderlandda Avropa klub çempionlarının kuboku turnirində gümüş medala layiq görülmüş, ötən il Almaniyada keçirilən turnirdə isə dördüncü yeri tutmuşdur.
Gənc ifaçıların konsert proqramından sonra yarışlar davam etdirilmişdir.
A qrupunda yer alan Azərbaycanın “Atasport” komandası ilk görüşdə Şotlandiyanın “Bonaqrass Qrove” klubu üzərində 5:3 hesabı ilə qələbə qazanmışdır.
Qrupun digər görüşündə isə Niderlandın “Hertogenboş” komandası Ukraynanın “Kolos” klubunu 6:0 hesabı ilə məğlub etmişdir.
Turnirin B qrupunda yarışan İngiltərənin “Lester” və Rusiyanın “Volqa Telekom” klubları arasındakı ilk oyunda İngiltərə xokkeyçiləri rəqib komandanın qapısından üç cavabsız top keçirmişlər.
Qrupun digər oyununda “Berliner” (Almaniya) və “Ritm” (Belarus) komandaları arasında görüş 2:2 hesabı ilə başa çatmışdır.
Bölmənin digər xəbərləri
