ATƏT-İN HAZIRKI SƏDRİ D.RUPEL MOSKVADA MƏSLƏHƏTLƏŞMƏLƏR KEÇİRMİŞDİR
AZƏRTAC-ın xüsusi müxbiri xəbər verir ki, Moskvada ATƏT-in hazırkı sədri, Sloveniyanın xarici işlər naziri Dmitri Rupel Rusiyanın xarici işlər naziri Sergey Lavrov, Təhlükəsizlik Şurasının katibi İqor İvanov və Dövlət Dumasının beynəlxalq məsələlər komitəsinin sədri Konstantin Kosaçov ilə məsləhətləşmələr keçirmişdir.
Rusiya XİN-in informasiya və mətbuat departamenti xəbər verir ki, danışıqlar zamanı ATƏT-in xarici işlər nazirləri şurasının 2004-cü il dekabrın 6-7-də Sofiyada keçirilmiş iclasının yekunları müzakirə edilmiş, təşkilatın fəaliyyəti və yaxın perspektiv üçün planları ilə bağlı fikir mübadiləsi aparılmışdır.
Görüş iştirakçıları Avropada sabitlik və təhlükəsizliyə dair əsas problemlərlə bağlı dialoq aparılması və qərarlar qəbul edilməsində ATƏT-in rolunun artırılmasının vacibliyinə tərəfdar olduqlarını bildirmişlər. Danışıqlarda ATƏT-in fəaliyyətinin hərbi-siyasi və antiterror cəhətlərinin inkişafına, iqtisadi və ekoloji sahələrdə işinin möhkəmləndirilməsinə, milli azlıqların hüquqlarının təmin olunması üçün humanitar sahədə təşkilatın potensialından məqsədyönlü istifadə edilməsinə dair konkret təkliflər nəzərdən keçirilmişdir. ATƏT-də islahatlar aparılması baxımından təşkilatın maliyyələşdirilməsi sisteminin təkmilləşdirilməsi, habelə ATƏT məkanında seçkilərin qiymətləndirilməsinin vahid obyektiv meyarlarının işlənib hazırlanması məsələlərinə xüsusi diqqət yetirilmişdir.
İkitərəfli münasibətlər sahəsində siyasi dialoqun yüksələn xətlə inkişafı, iqtisadi və mədəni əlaqələrin möhkəmləndirilməsinə səy göstərildiyi qeyd olunmuşdur.
ATƏT-in sədri təşkilatın üzvü olan ölkələrin hərbi doktrinasının müqayisə edilməsinə dair seminar keçirilməsi haqqında Rusiyanın təşəbbüsünü dəstəkləmişdir. Energetika təhlükəsizliyə dair konfrans keçirilməsi ilə bağlı məsələlər də müzakirə olunmuşdur.
Bölmənin digər xəbərləri
