ATƏT PARLAMENT ASSAMBLEYASININ ÜZVLƏRİ AZƏRBAYCAN HƏQİQƏTLƏRİNDƏN XƏBƏRDAR OLMUŞLAR
AZƏRTAC xəbər verir ki, Astanada ATƏT Parlament Assambleyasının 17-ci yay sessiyası iyulun 1-də iki daimi komissiyanın iştirakı ilə işini davam etdirir.
Parlament üzvləri “İnsan hüquqları və humanitar məsələlər”, “Ümumi və siyasi təhlükəsizlik məsələləri”, “İnsan alveri, uşaqların satılması və istifadə edilməsinə qarşı mübarizənin gücləndirilməsi”, “Uşaqların seksual təzyiqə məruz qalması ilə mübarizə”, “Aralıq dənizi ətrafı və azad ticarət”, “Elm, texnologiya və ətraf mühit” qətnamələrinin bəndlərində dəyişikliklər etmişlər.
“İnsan hüquqları və humanitar məsələlər” qətnaməsində ATƏT-də təmsil olunan dövlətlərin siyasi və tarixi arxivlərinin açılması və maraqlanan şəxslərin lazımi sənədləri əldə etməsi məsələsi erməni deputatların etirazı nəzərə alınmadan səs çoxluğu ilə təsdiq edilmişdir.
Türkiyənin parlament nümayəndələrinin rəhbəri Ələddin Böyükqaya demişdir ki, ermənilər ATƏT-in iclaslarında daim Türkiyə və Azərbaycan əleyhinə sənəd və təkliflər vermişlər. Biz isə bu sənəd və təklifləri ifşa edən tarixi mənbələr əsasında öz təkliflər toplumuzu vermişik. Artıq bu təkliflərin nəticəsi göz qabağındadır.
Azərbaycan Milli Məclisinin deputatı Fəttah Heydərov çıxışında ATƏT-in növbəti sessiyasının Orta Asiya məkanında keçirilməsini mühüm hadisə adlandıraraq bildirmişdir ki, 56 dövlətin nümayəndəsinin iştirak etdiyi toplantıda onların əksəriyyəti Azərbaycan həqiqətlərindən xəbərdar olmuşlar.
Sessiyanın növbəti iclaslarında Parlament Assambleyasının yeni sədri və üzvləri seçiləcəklər.
Bölmənin digər xəbərləri
