Avropa anbarlarında qaz ehtiyatları 82,5 faizə çatıb
Bakı, 30 sentyabr, AZƏRTAC
Avropa payız-qış mövsümü üçün yeraltı qaz anbarlarının 82,5 faizini doldurub.
AZƏRTAC xəbər verir ki, “Gas Infrastructure Europe” assosiasiyasının məlumatına görə, sentyabrın 28-də anbarlara qaz doldurulması 206 milyon kubmetr, qaz götürülməsi isə 28 milyon kubmetr təşkil edib. Hazırda Avropanın yeraltı anbarlarında 90,9 milyard kubmetr qaz var ki, bu da son beş ilin analoji dövrünün orta göstəricisindən 6,89 faiz azdır.
Avropa Komissiyasının tələblərinə əsasən, üzv ölkələr hər il noyabrın 1-dək özlərinin qaz anbarlarını 90 faizədək doldurmalıdır.
Avqust ayında Avropanın elektrik enerjisi istehsalında külək generasiyasının payı 14 faiz, sentyabrda isə 19 faiz olub.
Cari ay terminallardan Avropanın qazötürmə sisteminə maye qaz vurulması bu dövr üçün ən maksimal səviyyəsinə 69 milyard kubmetrə çatıb. Hazırda bu göstərici maksimum gücün 44 faizini təşkil edir.
London ICE birjasında min kubmetr qazın qiyməti avqustda ortalama 394 dollar, sentyabrda isə 393 dollar olub.
Bölmənin digər xəbərləri
