Avropa Azərbaycan Cəmiyyəti Dağlıq Qarabağ münaqişəsi qurbanlarının problemlərini Britaniya parlamentinin diqqətinə gətirir
Bakı, 9 iyun (AZƏRTAC). “Many Happy Returns” (MHR) kampaniyasının veb-saytı (http://www.manyhappyreturnsidp.com/) Avropa Azərbaycan Cəmiyyətinin (AAC) diqqəti çəkən layihələrindən biridir. Davamlı şəkildə fəaliyyət göstərən bu yeni internet layihəsinə uyğun olaraq, Böyük Britaniya parlamentinin hər bir üzvünə ad günü münasibətilə təbrik açıqcası göndərilir. Hər bir açıqcada 1 milyona yaxın azərbaycanlı qaçqın və məcburi köçkününün şəxsi mesajı da yer alır.
AAC-dən AZƏRTAC-a bildirmişlər ki, açıqcalarda Azərbaycanda qaçqın və məcburi köçkünlərin öz doğma yurd-yuvalarına qayıtmaq istəyi əksini tapmışdır. Hər bir açıqcada tanınmış alman fotoqrafı Filip Ratmer tərəfindən üç düşərgədə çəkilmiş məcburi köçkünün fotoşəkli yerləşdirilmişdir.
Açıqcaların müəllifləri MHR veb-saytında münaqişənin tarixi haqqında informasiyanı qrafik hekayə şəklində əldə edə və öz dəstəyini verə bilərlər. Həmçinin onlar erməni təcavüzü barədə müxtəlif ictimai xadimlərin də fikrini öyrənə bilərlər. Bu layihə AAC-nin bütün Avropa nümayəndəliklərində də fəaliyyət göstərəcəkdir.
Bölmənin digər xəbərləri
