Avropa İttifaqı inkişaf etməkdə olan ölkələrə ticarət üstünlükləri təqdim edəcək
Berlin, 2 dekabr, AZƏRTAC
Avropa İttifaqı Şurasına sədrlik edən Danimarka və Avropa Parlamentinin nümayəndələri inkişaf etməkdə olan ölkələrə ticarət imtiyazlarının verilməsini nəzərdə tutan Ümumi Preferensiyalar Sisteminin (GSP) yeni tənzimlənməsi üzrə ilkin razılığa gəliblər.
AZƏRTAC xəbər verir ki, yenilənmiş sistem insan haqları, əmək hüquqları və ətraf mühitin qorunması kimi sahələrdə beynəlxalq konvensiyalara əməl olunmasına dair tələbləri daha da gücləndirir. Sənədə ilk dəfə olaraq miqrasiya sahəsində əməkdaşlıq və qeyri-qanuni yaşayan vətəndaşların geri qəbuluna dair öhdəliklərin yerinə yetirilməsi ilə ticarət üstünlükləri arasında birbaşa əlaqə daxil edilib.
Yeni razılaşma, həmçinin GSP+ statusuna keçid imkanlarını genişləndirərək yaxın illərdə “ən az inkişaf etmiş ölkə” kateqoriyasından çıxacaq dövlətlərə davamlı inkişaf standartlarına əməl etməklə tarif güzəştlərindən yararlanmaq imkanı yaradacaq. Eyni zamanda, ticarət imtiyazlarının sui-istifadəsinin qarşısını almaq üçün sektorlar üzrə məhdudlaşdırma hədləri 57 faizdən 47 faizə endirilib.
Təchizat zəncirində şəffaflığın artırılması, monitorinq mexanizmlərinin gücləndirilməsi, mənşə qaydalarının inkişaf səviyyəsinə uyğunlaşdırılması kimi yeniliklər də paketin tərkib hissəsidir. Razılaşmada həssas məhsullar üzrə müdafiə tədbirləri də nəzərdə tutulur. Belə ki, idxalın kəskin artması halında müəyyən məhsullar üçün gömrük rüsumlarının müvəqqəti bərpasına imkan yaradılır. Xüsusilə düyü idxalı üçün yeni avtomatik müdafiə mexanizmi tətbiq ediləcək.
Sənədin növbəti mərhələdə Aİ Şurası və Avropa Parlamenti tərəfindən təsdiqlənməsi gözlənilir. Yeni GSP tənzimləməsinin 2027-ci il yanvarın 1-dən qüvvəyə minməsi planlaşdırılır.
Berlin
Bölmənin digər xəbərləri
