Avropa Komissiyası sualtı internet kabellərinin təhlükəsizliyini gücləndirmək üçün 347 milyon avro ayırıb
Berlin, 6 fevral, AZƏRTAC
Avropa Komissiyası sualtı internet kabellərinin təhlükəsizliyini gücləndirmək üçün 347 milyon avroluq yeni investisiya paketi və risklərin azaldılmasına yönəlmiş “Kabel Təhlükəsizliyi Alətlər Paketi”ni təqdim edib.
AZƏRTAC Komissiyanın saytına istinadla xəbər verir ki, qitələrarası internet trafikinin 99 faizini həyata keçirən bu kabellər həm gündəlik həyat, həm də Avropa iqtisadiyyatı üçün kritik infrastruktur sayılır. Yeni alətlər paketi sualtı kabel sistemlərini qorumaq üçün 6 strateji, 4 texniki və dəstək tədbirini ehtiva edir. Komissiya, eyni zamanda, ictimai maliyyələşdirmə üçün nəzərdə tutulan 13 “Avropa Marağına Uyğun Kabel Layihəsi” (CPEI) sahəsini müəyyənləşdirib və bu layihələr üçün maliyyələşdirməni 2040-cı ilədək mərhələli şəkildə planlaşdırır.
Maliyyələşdirmə xüsusi proqram çərçivəsində həyata keçiriləcək və məqsəd kabellərin dayanıqlılığını artırmaq, təmir imkanlarını genişləndirmək və onları “ağıllı” sistemlərlə təchiz etməkdir. Pilot mərhələnin əsas hədəfi Baltik dənizində kabellərin təhlükəsizliyinin təmin olunmasıdır. Çünki son illərdə bu bölgədə sualtı kabellərin zədələnməsi halları artıb və bunun qəsdən törədilən təxribat ola biləcəyi ehtimalı güclənib. Layihə təklifləri təkcə mülki müdafiə, sahil mühafizəsi və hərbi dəniz qüvvələri kimi ictimai qurumlar tərəfindən təqdim edilə biləcək.
Qeyd edək ki, 2024-2027-ci illər üzrə sualtı kabel layihələri üçün ümumilikdə 533 milyon avro nəzərdə tutulub və artıq 25 layihəyə 186 milyon avro ayrılıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
