Avropa siyasətçiləri: Müdafiə məqsədlərinə daha çox investisiya qoymağın vaxtı çatıb
Budapeşt, 20 fevral, AZƏRTAC
Avropa İttifaqında müdafiəyə sərmayəni artırmaq məsələsində getdikcə artan əhvali-ruhiyyə formalaşır. Bu, Avropa media orqanlarının monitorinqinin göstərdiyi kimi, Avropanın təhlükəsizliyinə dair dünənki Paris danışıqlarından sonra xüsusilə nəzərə çarpır.
AZƏRTAC xəbər verir ki, bir çox siyasətçilər hesab edirlər ki, Aİ ölkələri ciddi qəbul olunmaq istəyirlərsə, iqtisadi və hərbi cəhətdən daha da gücü olmalıdır. Xüsusən də Almaniya kansleri Olaf Şolts və Çexiyanın Baş naziri Petr Fiala kimi bir sıra siyasətçilər görüşdən sonra bunu bəyan ediblər.
Xatırladaq ki, bu həftənin əvvəlində Fransa prezidenti Emmanuel Makron görüş keçirib, lakin həmin vaxt onun formatı məhdud olub və yalnız bir neçə Avropa liderinə dəvət göndərilib. Çərşənbə günü o, Kanada da daxil olmaqla digər Aİ və NATO ölkələrini dəvət edərək başqa bir görüş çağırıb. Bir çox liderlər videoformatda müzakirəyə qatılıb.
Görüşün yekunu ondan ibarətdir ki, hamı yeni reallıqda Avropanın daha güclü olması qənaətinə gəlib. Aİ ölkələrinin öz müdafiəsinə daha çox maliyyə vəsaiti ayırması ilə bağlı konsensus var. Təhlükəsizlik və müdafiəyə gəldikdə, dövlətlər həm ayrı-ayrı ölkələr səviyyəsində, həm də Avropa səviyyəsində büdcələrini artırmalıdır.
Bir çox siyasətçilər hesab edir ki, Aİ ölkələri pul və silahları masaya qoymalıdır və yalnız bundan sonra dünya onları ciddi qəbul edəcək.
Onların fikrincə, okeanın o tayından gələn son bəyanatlar fonunda Avropanın mövqeyini gücləndirmək də vacibdir.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
