“Avropa Siyasi Birliyi”nin Zirvə toplantısında Azərbaycanın təşəbbüskar və məsuliyyətli mövqeyi nümayiş etdirilib ŞƏRH
Bakı, 5 may, AZƏRTAC
Müasir beynəlxalq münasibətlər sistemində regional sabitlik və davamlı sülhün təmin olunması dövlətlərarası əməkdaşlığın əsas prioritetlərindən biridir. Avropa məkanında siyasi dialoqun inkişafına xidmət edən Avropa Siyasi Birliyi platforması isə mühüm əhəmiyyət kəsb edir. Bu çərçivədə Prezident İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxış edərək regionda sülh və əməkdaşlıq gündəliyi ilə bağlı Azərbaycanın mövqeyini bir daha beynəlxalq ictimaiyyətin diqqətinə çatdırıb. Dövlətimizin başçısı öz çıxışında Azərbaycan–Ermənistan münasibətlərinin normallaşdırılması istiqamətində əldə olunan irəliləyişləri qeyd etməklə yanaşı, sülhün alternativsiz olduğunu da vurğulayıb.
Bunu AZƏRTAC-a açıqlamasında Milli Məclisin Regional məsələlər komitəsinin sədri Siyavuş Novruzov deyib.
O, Azərbaycanın postmünaqişə dövründə sülh təşəbbüslərinin müəllifi kimi çıxış etdiyini vurğulayıb. Regionda uzunmüddətli sabitliyin təmin olunması üçün ardıcıl addımlar atılır. Bu kontekstdə Ermənistanın da konstruktiv mövqe nümayiş etdirməsi vacibdir. Ermənistan tərəfi “Avropa Siyasi Birliyi”nin Zirvə görüşünün 2028-ci ildə Azərbaycanda keçirilməsini dəstəkləməklə regional əməkdaşlıq istiqamətində müsbət siqnal verib. Sülh gündəliyinin real nəticələri artıq praktik müstəvidə də özünü göstərir. Belə ki, əldə olunan razılaşmalar çərçivəsində Azərbaycan ərazisi vasitəsilə Ermənistana 28 min ton yükün çatdırılması regionda iqtisadi əlaqələrin bərpası və qarşılıqlı etimadın möhkəmləndirilməsi baxımından mühüm addım kimi qiymətləndirilir. Bu fakt bir daha sübut edir ki, əməkdaşlıq və qarşılıqlı fayda prinsiplərinə əsaslanan siyasət region üçün yeni imkanlar açır.
S.Novruzov Prezident İlham Əliyevin öz çıxışında bəzi Avropa institutlarının mövqeyinə toxunduğunu diqqətə çatdıraraq deyib: “Xüsusilə Avropa Parlamenti və Avropa Şurası Parlament Assambleyası tərəfindən Azərbaycan-Ermənistan sülh prosesinə münasibətdə qeyri-konstruktiv yanaşmanın nümayiş etdirildiyi qeyd olunub. Bildirilib ki, bu qurumlar bəzən ikili standartlardan çıxış edərək regionda sülh səylərinə dəstək vermək əvəzinə, əsassız iddialar və qərəzli yanaşmalar sərgiləyirlər. Çünki Avropa Parlamenti kimi qurumlar qlobal miqyasda aktual olan ksenofobiya, islamofobiya, antisemitizm, miqrasiya problemləri, sosial bərabərsizlik və evsiz insanların vəziyyəti kimi fundamental məsələlərin həllinə daha çox diqqət ayırmaq əvəzinə, bəzi hallarda dezinformasiya yayaraq Azərbaycanı hədəfə alırlar. Bu cür yanaşmalar isə beynəlxalq əməkdaşlıq ruhuna zidd olmaqla yanaşı, regionda etimad mühitinin formalaşmasına da mənfi təsir göstərir. Bütün bu çağırışlara baxmayaraq, Azərbaycan sülh gündəliyinə sadiqliyini qətiyyətlə davam etdirir. Sülh prosesinə mane olmaq istəyən tərəflərin bütün cəhdlərinə baxmayaraq, Azərbaycan konstruktiv dialoq və beynəlxalq hüququn prinsiplərinə əsaslanan siyasət yürütməkdə qərarlıdır. Bu yanaşma regionda davamlı sabitliyin və təhlükəsizliyin təmin olunması üçün mühüm zəmin yaradır”.
Deputatın sözlərinə görə, “Avropa Siyasi Birliyi”nin Zirvə toplantısı çərçivəsində səsləndirilən fikirlər bir daha göstərib ki, Cənubi Qafqazda sülh və əməkdaşlıq üçün real imkanlar mövcuddur. Azərbaycanın təşəbbüskar və məsuliyyətli mövqeyi isə bu prosesdə aparıcı rol oynamağa davam edir. Regionda dayanıqlı sülhün bərqərar olması yalnız dövlətlərin siyasi iradəsi və qarşılıqlı hörmətə əsaslanan əməkdaşlıq sayəsində mümkündür.
Bölmənin digər xəbərləri
