Avropada COVID-19 yenidən cövlan edir
Bakı, 21 avqust, AZƏRTAC
Avropada COVID-19 koronavirusunun yenidən sürətlə yayılması qeydə alınıb. Məzuniyyətlər dövrü başlanandan bəri xəstələnənlərin sayı kəskin artıb. AZƏRTAC Euronews-a istinadla xəbər verir ki, bu həftə Fransada növbəti antirekord qeydə alınıb. Sutka ərzində koronavirusa yoluxanların sayı 4771-ə çatıb. Bu, epidemiyanın pik vəziyyətindəki rəqəmə çox yaxındır. Doğrudur, ölüm hallarının sayı hələlik aşağı səviyyədədir, lakin yeni məlumatlar bu ilin payızında COVID-19-un ikinci dalğası barədə bədbin proqnozları təsdiqləyir.
Çimərliklərdə keçirilən məclislər, fəal gecə həyatı, turizm axınının artması... Ekspertlərin fikrincə, bu səbəblər üzündən İspaniyada, xüsusən ölkənin şimalında xəstəliyin yeni ocaqları çoxalır. İspaniya Səhiyyə Nazirliyi həyəcan təbili çalır: pandemiya başlanandan bəri Krallıqda COVID-19-a yoluxma hallarının təsdiqlənmiş sayı 370 mindən çoxdur.
İspaniyanın hakimiyyət orqanları məşhurlara müraciət edərək koronavirusun profilaktikası haqqında informasiyanın gənclər arasında yayılması kampaniyasına qoşulmalarını xahiş edib. İspaniya Səhiyyə Nazirliyi yanında Səhiyyə Sahəsində Fövqəladə Halların Əlaqələndirilməsi Mərkəzinin rəhbəri Fernando Simonun fikrincə, “bu insanların cəmiyyətdə nüfuzu var, sosial şəbəkələrdə onları izləyirlər, buna görə də düşünürəm ki, onlar bizim işimizdə çox faydalı ola bilər”.
Epidemiyadan ən çox zərər çəkmiş İtaliya da haqlı olaraq pandemiyanın ikinci dalğasına görə çox narahatdır, buna görə də aeroportlarda nəzarət tədbirlərinə ciddi yanaşır. Avropa İttifaqına daxil olan bəzi ölkələrdən İtaliyaya gələn sərnişinlər üçün məcburi testlər tətbiq edilir, lakin hələlik yeni özünütəcrid tədbirləri tətbiq edilməsi planlaşdırılmır. Məsələn, İtaliya məktəbləri adətən olduğu kimi - sentyabrda açılmalıdır.
Fransa Prezidenti Emmanuel Makron bütün ölkədə yenidən, baharda olduğu kimi karantin tətbiq olunmasını istisna edib, lakin hər bir konkret regionda vəziyyətdən asılı olaraq lokal tədbirlər görülə biləcəyini bəyan edib.
Bölmənin digər xəbərləri
