AVROPADA MƏSKUNLAŞMIŞ SOYDAŞLARIMIZ HƏR SAHƏDƏ AZƏRBAYCANA XİDMƏTETMƏYƏ HAZIRDIRLAR
“Zati aliləri, cənab Prezident!
Biz, Avropa Azərbaycanlıları Konqresinin (AAK) təsis konfransının
iştirakçıları 2004-cü il aprelin 17-də Almaniya Federativ Respublikasının paytaxtı Berlin şəhərində toplanaraq Azərbaycan diaspor quruculuğunun çağdaş durumunu və perspektivlərini geniş müzakirə etdik. Toplantı iştirakçıları bir fikri yekdilliklə vurğuladılar ki, bu gün dünya azərbaycanlılarının vahid ümummilli ideya - azərbaycançılıq, müstəqil dövlətçilik və milli-mənəvi dəyərlər ətrafında birləşməsi prosesi uğurla davam edir. Biz, xarici ölkələrdə yaşayan azərbaycanlılar, doğma Vətənimizdə bərqərar olmuş ictimai-siyasi sabitliyin, iqtisadi yüksəlişin, uğurla həyata keçirilən siyasi kursun davamlı olmasını istəyir, hər sahədə Azərbaycana xidmət etməyə və Sizin fəaliyyətinizi dəstəkləməyə hazır olduğumuzu bəyan edirik.
Möhtərəm Prezident!
Toplantı iştirakçıları hesab edir ki, dünyanın müxtəlif guşələrində fəaliyyət göstərən Azərbaycan cəmiyyətlərinin təşkilatlanma prosesinin geniş vüsət alması və birgə işbirliyi naminə icma və birliklərin diaspor federasiyaları şəklində formalaşdırılması artıq günün tələbinə çevrilmişdir.
Konfransımızın iştirakçıları Avropada fəaliyyət göstərən Azərbaycan icma və birliklərinin mövcud imkanlarını, qayğı və problemlərini də geniş müzakirə etmişlər. Belə bir ortaq fikir ifadə olunmuşdur ki, Avropa ölkələrində məskunlaşmış soydaşlarımızın tarixi Vətənləri ilə əlaqələrini, dünya azərbaycanlıları arasında mənəvi, siyasi birliyi, həmrəyliyi daha da möhkəmləndirmək, onların milli, sosial, vətəndaş hüquqlarını müdafiə etmək, milli-mənəvi dəyərləri birgə qorumaq, Azərbaycan icma və birliklərinin regionda fəaliyyətlərini əlaqələndirmək məqsədi ilə Avropa Azərbaycanlıları Konqresi təsis edilsin.
Tədbirin iştirakçıları əminliklə qeyd etdilər ki, Vətənin hüdudlarından kənarda olan Azərbaycan icmalarının birliyi ideyasının gerçəkləşməsi yalnız ümummilli liderimiz Heydər Əliyevin milləti və dövləti dirçəltmək naminə apardığı böyük və müqəddəs işə onların ürəkdən inamları sayəsində mümkün olmuşdur.
Sizi əmin edirik ki, Avropa Azərbaycanlıları Konqresi doğma Vətənimizin şərəf və ləyaqətini həmişə yüksək tutacaq, quruma daxil olan soydaşlarımızın icma və birlikləri isə Azərbaycan həqiqətlərini, o cümlədən müxtəlif sahələrdə qazanılmış uğurları məskunlaşdıqları ölkənin əhalisinə, eləcə də dünya ictimaiyyətinə çatdıracaq, Vətənimizin iqtisadi qüdrətinin artmasında fəal iştirak edəcəklər. Avropa Azərbaycanlıları Konqresi bütün azərbaycanlıları bir araya gətirmək istiqamətində öz fəaliyyətini bundan sonra daha da genişləndirəcək, soydaşlarımızın həyatında mühüm əhəmiyyət kəsb edən digər problemlərin həllinə layiqli töhfəsini verəcəkdir.
Cənab Prezident!
Sizə konfrans iştirakçılarının səmimi salamlarını, xoş arzularını yetirir, doğma Vətənimiz olan Azərbaycanın tərəqqisi, inkişafı və dünya azərbaycanlılarını tarixi Vətənləri ətrafında birləşdirmək istiqamətində fəaliyyətinizdə böyük uğurlar diləyirik”.
Bölmənin digər xəbərləri
