Avropada yeraltı qaz anbarlarının doluluq səviyyəsi 98 faizə yaxınlaşıb
Bakı, 16 oktyabr, AZƏRTAC
Avropa İttifaqında (Aİ) yeraltı qaz anbarlarının doluluq səviyyəsi 98 faizə yaxınlaşıb.
AZƏRTAC “Gas Infrastructure Europe” Assosiasiyasının məlumatına istinadla xəbər verir ki, Avropada qaz anbarlarının doluluq səviyyəsi sutkada 0,05 faiz bəndi artaraq 97,89 faizə çatıb və tarixi maksimumu yeniləyib. Belə ki, öncəki rekord göstərici (97,84 faiz) 2019-cu ilin oktyabrında əldə olunub.
Məlumata görə, hazırda anbarlarda olan qazın həcmi 107,75 milyard kubmetr təşkil edir.
Qeyd edək ki, Rusiya-Ukrayna müharibəsindən əvvəl Aİ ölkələri təbii qazın 40 faizini Rusiyadan idxal edirdi. Müharibə nəticəsində Rusiyanın Aİ-yə təbii qaz nəqli kəskin şəkildə azaldı. Müharibənin başlaması ilə Aİ ölkələri yeraltı təbii qaz anbarlarının qış aylarına qədər doldurulmasını məcburi edəcək qanuni tənzimləmələr hazırladı. Bu çərçivədə noyabrın 1-dək qaz anbarlarının 90 faizinin doldurulması nəzərdə tutulurdu.
Bölmənin digər xəbərləri
