Avropalı müşahidəçilər Azərbaycanda keçirilən seçkiləri nümunə hesab edirlər
Bakı, 2 noyabr, AZƏRTAC
Azərbaycanda keçirilən parlament seçkilərini izləmək üçün müşahidə missiyası göndərən daha bir təşkilat Avropa Strateji Kəşfiyyat və Təhlükəsizlik Mərkəzi olub.
AZƏRTAC xəbər verir ki, müşahidə missiyasının rəhbəri Klaude Moniquet noyabrın 2-də keçirilən mətbuat konfransında seçkilərin Avropa standartlarına uyğun keçirildiyini bildirib. O deyib: “Komandamız seçki günü Bakıda, Sumqayıtda və Xırdalanda 100 seçki məntəqəsinə, 6 seçki dairəsinə baş çəkərək müşahidə apardı. Səsvermə prosesi yüksək səviyyədə təşkil edilmişdi. Məntəqələr bütün zəruri avadanlıqla təchiz olunmuşdu. Seçici fəallığı yüksək idi, qadınların fəallığı isə xüsusi qeyd edilməlidir. Seçkiləri sosial mənsubiyyətinə, peşəsinə və ya siyasi baxışlarına görə fərqlənən xeyli sayda yerli müşahidəçi izləyirdi. Seçki komissiyalarında da xeyli sayda qadın var idi”.
K. Moniquet bildirib ki, Azərbaycan ərazisinin bir hissəsi Ermənistan tərəfindən işğal edilməsinə, ölkədə bir milyondan artıq qaçqın və məcburi köçkün olmasına baxmayaraq, bu seçkilər azad, ədalətli və şəffaf keçirildi. Azərbaycandakı seçkilər digər ölkələr üçün nümunə ola bilər.
Bölmənin digər xəbərləri
