Avrozonada iqtisadi geriləmə müşahidə olunur
Bakı, 24 oktyabr, AZƏRTAC
Oktyabr ayında Avrozonada özəl sektorun fəaliyyəti 2020-ci ilin noyabrından bəri ən aşağı səviyyəyə düşüb.
AZƏRTAC xarici KİV-lərə istinadla xəbər verir ki, “S&P Global Ratings" reytinq agentliyi Avrozona üçün oktyabr ayı üçün iqtisadi hesabat təqdim edib. Məlumata görə, 20 ölkədən ibarət regionda faiz dərəcələrinin artması və özəl sektor fəaliyyətlərində tələbin azalmasının təsiri ilə oktyabr ayında geriləmə olub. Bölgədə xidmət sektoru oktyabrda 48,7-dən 47,8-ə azalaraq son 32 ayın ən aşağı səviyyəsinə düşüb.
Bu arada Avropa Mərkəzi Bankı (AMB) yüksək inflyasiyaya qarşı artan faiz dərəcələri ilə mübarizə aparır. Bu, istehlakçılar üçün kredit xərclərini artırır və tikinti və digər sektorlara investisiyaları bahalaşdırmaqla iqtisadiyyatı ləngidir.
Avrozonada özəl sektor fəaliyyətlərində dərinləşən daralma investorların AMB prezidenti Kristin Laqardın “uzun müddət yüksək” faiz ritorikasının bəzi analitiklərin gözlədiyi qədər davam edə bilməyəcəyini qiymətləndirməsinə səbəb olub.
Bölmənin digər xəbərləri
