Bakı, 25 sentyabr, AZƏRTAC

Azərbaycan Avtomobil Yolları Dövlət Agentliyi (AAYDA) tərəfindən sentyabrın 18-dən 24-dək olan müddətdə yol tikintisi və təmiri sahəsində görülən işlər barədə məlumat açıqlanıb.

Agentliyin İctimaiyyətlə əlaqələr şöbəsindən AZƏRTAC-a bildirilib ki, həmin dövr ərzində Zaqatalada sel sularının ziyan vurduğu körpüdə hərəkət bərpa olunub, Xaçmazda çökmüş körpünün söküntüsü və ərazinin təmizlənməsi davam edir, Pensər-Toradi avtomobil yolunun 1-ci kilometrində hərəkət bərpa olunub, M-1 magistral avtomobil yolunun bir hissəsində aparılan yenidənqurma işləri yekunlaşır.

Həmçinin Yevlax-Xocalı-Laçın avtomobil yolunda ermənilərin vaxtilə Şuşanın girişində quraşdırdıqları tank sökülərək Bakıdakı Hərbi Qənimətlər Parkına gətirilib, şəhid gizir Nəcməddin Quliyevin son arzusu olaraq yaşadığı Çünzəli kəndinin yolu asfaltlanıb.