Azərbaycan “6-cı Digital Art EXPO Megève” tədbirində təmsil olunub
Paris, 13 yanvar, AZƏRTAC
Azərbaycan Respublikasının Diasporla İş üzrə Dövlət Komitəsinin dəstəyi, “Global Oracle Association for Leaders” (GOAL) təşkilatının təsisçisi və prezidenti Leyla Bağırzadə və “Digital Art Expo”nun əməkdaşlığı ilə Azərbaycan “6-cı Digital Art EXPO Megève” tədbirində təmsil olunub.
AZƏRTAC xəbər verir ki, “Palais de Megève” auditoriyasında keçirilmiş tədbirdə rəqəmsal incəsənətin müasir inkişaf istiqamətləri, yaradıcı innovasiyaları, eləcə də texnologiya ilə incəsənətin kəsişməsində formalaşan yeni ifadə vasitələri beynəlxalq auditoriyaya təqdim edilib.
Tədbirdə Azərbaycanın Fransadakı səfiri Leyla Abdullayeva, səfirliyin, habelə Diasporla İş üzrə Dövlət Komitəsinin nümayəndələri iştirak ediblər. Bu layihədə iştirakımız Azərbaycanın yaradıcı sənaye potensialının beynəlxalq platformada tanıdılması, mədəni diplomatiyanın gücləndirilməsi və azərbaycanlı yaradıcı istedadların qlobal şəbəkələrə inteqrasiyası baxımından xüsusi əhəmiyyət kəsb edir.
Tədbir çərçivəsində sərgilər təşkil olunub, yaradıcı icmalar arasında peşəkar mübadilə və dialoq təşviq edilib. Rəqəmsal incəsənətin mədəniyyət, innovasiya və yaradıcı sənayelər ekosistemində rolu üzrə fikir mübadiləsi üçün əlverişli platforma formalaşıb. Bu əməkdaşlıq, eyni zamanda, müxtəlif ölkələrdən sənətçilərin və tərəfdaşların bir araya gətirilməsi vasitəsilə mədəniyyətlərarası əlaqələrin gücləndirilməsinə xidmət edib.
Layihənin icrasında peşəkar koordinasiya və mentor dəstəyi də təmin edilib. Layihənin koordinatoru (art-menecer) Agnessa Tariverdiyeva, “Atesh Hub”ın mentoru qismində isə Səbinə Şıxlinskaya çıxış edib.
Emin Mathersin tədbirdə nümayiş olunan rəqəmsal işləri müasir vizual dilin estetikası ilə texnoloji düşüncəni birləşdirərək, tamaşaçını yeni qavrayış müstəvilərinə yönəldib. Onun əsərlərində dinamika, kompozisiya intizamı və rəng həlləri vasitəsilə rəqəmsal mühitin emosional və konseptual imkanları ön plana çıxır. Bu yanaşma müasir rəqəmsal incəsənətin beynəlxalq auditoriya ilə ünsiyyətini gücləndirən təsirli vizual dil formalaşdırır.
Ramil Məmmədlinin SF (Signal Fragment) işi şüurun neyroelm, sistem nəzəriyyəsi və informasiya prosesləri prizmasından araşdırılmasına əsaslanan konseptual yanaşmanı təqdim edib. Hər bir işin mərkəzində ruh kimi qavranılan dairə dayanır. Ruh burada sistemin nüvəsi kimi çıxış edir: siqnalı qəbul edir, dəyişdirir və ötürür, yüklənmə şəraitində belə formasını qoruyur.
Dairəni əhatə edən fraqmentlər və vizual “səs-küy” yaddaşı, məlumat axınlarını və xarici təsirləri əks etdirir. Bu konsepsiyada məna formanın özündə deyil, elementlərin qarşılıqlı əlaqəsində yaranır. SF siqnalın təmizliyini itirdiyi və sistemin ruhun özünə təsir göstərməyə başladığı anları qeydə alır, bu hal “səhv” kimi deyil, mürəkkəb sistemlərin təbii vəziyyəti kimi təqdim olunur.
Nərgiz Ramizqızının işləri zərif vizual poetika ilə müasir rəqəmsal texnikaların harmoniyasını nümayiş etdirib. Əsərlərində duyğu, yaddaş və identiklik mövzuları çağdaş ifadə vasitələri ilə işlənərək tamaşaçı ilə incə, lakin dərin emosional əlaqə yaradır. Bu yanaşma rəqəmsal incəsənətin yalnız texniki deyil, həm də humanitar-estetik ölçülərini ön plana çıxarır.
Tədbir çərçivəsində beynəlxalq yaradıcı mühitin təmsilçiləri ilə tanışlıq da təmin olunub.
“VI Digital Art EXPO Megève” çərçivəsində “GOAL” və “Digital Art Expo” arasında qurulan əməkdaşlıq, Azərbaycanın rəqəmsal incəsənət sahəsində yaradıcı potensialının beynəlxalq platformada təqdim olunmasına, mədəni diplomatiyanın möhkəmlənməsinə və yeni tərəfdaşlıqlar üçün dayanıqlı dialoq mühitinin formalaşmasına töhfə verib. “GOAL” bu istiqamətdə beynəlxalq tərəfdaşlarla birgə, yaradıcı sənayelərin inkişafını, istedadların üzə çıxmasını və innovasiyaəsaslı mədəni əməkdaşlıq modellərini dəstəkləməkdə davam edəcəkdir.
Bölmənin digər xəbərləri
