Bakı, 25 sentyabr, AZƏRTAC

İnnovasiya və Rəqəmsal İnkişaf Agentliyi beynəlxalq nüfuzlu texnologiya tədbiri olan “TechCrunch Disrupt”da iştirak edib.

Agentlikdən AZƏRTAC-a bildirilib ki, sentyabrın 19-21-də ABŞ-ın San-Fransisko şəhərində keçirilən tədbirdə Agentliyin sədr əvəzi İnarə Vəliyeva, eləcə də digər nümayəndəliyi, yerli startaplar və texnologiya mediaları iştirak edərək geniş heyətlə Azərbaycanı bütün platformalarda təmsil ediblər.

Eyni zamanda, dünyanın bir çox ölkəsindən gələn tədbir iştirakçıları və qonaqlar “Azərbaycan” pavilyonunu ziyarət edərək ölkənin innovasiya ekosistemi ilə yaxından tanış olublar. Qeyd edək ki, “PASHA Holding”in sponsor olduğu “Azərbaycan” pavilyonu ən çox ziyarət edilən pavilyonlar sırasında yer alıb.

Qeyd edək ki, “TechCrunch Disrupt” dünyanın ən böyük startap tədbiri hesab olunur. Tədbir ən yaxşı və parlaq startapları, investorları, texnologiya həvəskarlarını bir araya gətirir.

Tədbirin ilk günündə İRİA-nın sədr əvəzi İnarə Vəliyeva “Rəqəmsal İpək Yolu: Mərkəzi Avrasiyadan Silikon Vadisinə uzanan yol” panel sessiyasında çıxış edib. Qazaxıstan və Özbəkistandan olan çıxışçıların yer aldığı sessiyada İnarə Vəliyeva Agentliyin gördüyü işlərə və Azərbaycanın innovasiya mənzərəsinə diqqəti çəkib.

“Azərbaycan innovasiya ekosistemi sahəsində sürətlə tərəqqiyə gedən ölkələr sırasındadır. Bu yolda əsas yanaşmamız Azərbaycanda yerli, eləcə də xarici İKT şirkətləri üçün əlverişli mühit yaratmaq, insan kapitalına sərmayə qoymaq, startapları bütün istiqamətlərdə irəliyə aparan ekosistemi dəstəkləməkdir. Həmçinin missiyamız, Azərbaycanın texnoloji və innovativ tərəqqi ilə ayaqlaşması ilə yanaşı, həm də regionda innovasiyalara öncüllük etməsi, bununla da beynəlxalq arenada davamlı böyüməsini və rəqabətə davamlılığını təmin etməkdir”, - deyə İnarə Vəliyeva qeyd edib.

Tədbir zamanı Azərbaycan nümayəndəliyində yer alan startaplar öz layihələrini geniş auditoriyaya təqdim ediblər. “E-LEGAL”, “CodeAny”, “Recepta”, “Voiceloft”, “Senpex” “GrowthChannel”, “PolygrafAI”, “Neuroil” kimi startapların ideyaları investorlar və digər xarici ekosistem nümayəndələri tərəfindən maraqla qarşılanıb, bəzi şirkətlərlə potensial əməkdaşlıq formatları müzakirə olunub.

Səfər çərçivəsində sentyabrın 21-də Azərbaycan Texnoloji Diasporu və “Silkroad Innovation Hub”ın birgə təşkilatçılığı ilə görüş keçirilib. Görüşdə ABŞ-da yaşayan və İKT sahəsində fəaliyyət göstərən 60-dək azərbaycanlı iştirak edib. Görüş zamanı İRİA-nın sədr əvəzi İnarə Vəliyeva, İRİA-nın innovasiya üzrə rəhbəri İqor Ovçarenko və “Caucasus Ventures”in təsisçisi Məmməd Kərimin iştirakı ilə panel sessiyası keçirilib. Burada iştirakçılara Agentliyin İKT və innovasiya sahəsi, startap, investisiya mühitinin inkişafı üzrə gördüyü işlərlə bağlı məlumat verilib. “Silkroad Innovation Hub”ın türk ölkələrini rəqəmsal sahədə birləşdirmək və vahid mərkəz yaratmaq səyləri yüksək qiymətləndirilib və bu istiqamətlərdə birgə fəaliyyətin önəmi vurğulanıb.

Qeyd edək ki, “Silkroad Innovation Hub” Mərkəzi Avrasiyadan olan startaplara və sahibkarlara Silikon Vadisində və ABŞ bazarında öz müəssisələrini qurmaq və ya genişləndirmək üçün yollar tapmaqda dəstək verir.