Azərbaycan Boks Federasiyasının rəsmisi: Yeni ilə yeni nəfəslə başlayacağıq
Bakı, 20 dekabr, AZƏRTAC
“Azərbaycanda boksun inkişafı üçün ardıcıl tədbirlər keçirilir. Ölkə çempionatının da yüksək səviyyədə təşkili buna bariz nümunədir”.
AZƏRTAC xəbər verir ki, bu sözləri Azərbaycan Boks Federasiyası prezidentinin müşaviri Samir Hüseynov kişilər arasında ölkə çempionatının bağlanış mərasimi zamanı jurnalistlərə açıqlamasında deyib.
O bildirib ki, Azərbaycan çempionatında beynəlxalq yarışlarda medal qazanmış idmançılar da mübarizə aparırlar: “Gənc idmançıları burada görmək müsbət məqamdır. Kişi boksçulardan ibarət milli komandaya yeni təyin olunan özbəkistanlı baş məşqçi Ravşan Xocayevin də əsas məqsədi gəncləri inkişaf etdirmək və 2028-ci ildə ABŞ-ın Los-Anceles şəhərində təşkil olunacaq Yay Olimpiya Oyunlarına lisenziya qazanmaqdır. Yeni ilə yeni nəfəslə başlayacağıq. Bunun üçün idmançılarımızın müxtəlif turnirlərdə iştirakı nəzərdə tutulub. Qarşıdakı yarışlardan Vətənə daha çox medalla dönmək istəyirik”.
Qeyd edək ki, kişi boksçular arasında Azərbaycan çempionatına bu gün yekun vurulacaq. Qadın boksçuların yarışı isə artıq başa çatıb. İki çəki dərəcəsində medalçılar bəlli olub. Həmçinin 5 çəkidə Boks Federasiyasının seçmə turnirinin qalibləri müəyyənləşib.
Bölmənin digər xəbərləri
