Azərbaycan-CAR parlamentlərarası əməkdaşlığının inkişafı ilə bağlı fikir mübadiləsi aparılıb
Bakı, 29 noyabr, AZƏRTAC
Noyabrın 27-də Azərbaycanın Cənubi Afrika Respublikasındakı (CAR) səfirliyinin müvəqqəti işlər vəkili Hüseyn Rəhimli ölkənin qanunverici hakimiyyət paytaxtı hesab olunan Keyptaun şəhərinə səfəri çərçivəsində CAR-ın Milli Assambleyasının sədr müavini xanım Annelie Lotriet ilə görüşüb.
Səfirlikdən AZƏRTAC-a verilən məlumata görə, görüşdə parlamentlərarası əməkdaşlığın inkişaf etdirilməsinə dair fikir mübadiləsi aparılıb, eləcə də qarşılıqlı maraq kəsb edən digər məsələlər müzakirə olunub.
A.Lotriet iki ölkənin qanunverici orqanları arasında əməkdaşlıq əlaqələrinin inkişaf etdirilməsinin xalqlarımız arasında mövcud dostluq münasibətlərinə müsbət töhfə verə biləcəyini xüsusi vurğulayıb. O, CAR-ın dost Azərbaycan ilə əlaqələrinin müxtəlif sahələrdə, o cümlədən parlamentlər səviyyəsində daha da inkişaf etdirilməsinə böyük əhəmiyyət verdiyini dilə gətirərək, ölkələrimiz arasında mövcud münasibətlərin qarşılıqlı hörmətə əsaslandığını söyləyib. Eyni zamanda, A.Lotriet ölkəmizdə uğurla keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində əldə olunan nəticələri qeyd edib.
Öz növbəsində H.Rəhimli Azərbaycanla CAR arasında parlamentlərarası dialoqun keyfiyyətcə yeni səviyyəyə qaldırılması üçün yaxşı imkanların olduğuna toxunaraq, əlaqələrin gələcək inkişafı üçün parlament rəhbərliyi səviyyəsində qarşılıqlı səfərlərin həyata keçirilməsinin zəruriliyini vurğulayıb. O, Milli Məclisdə Azərbaycan-CAR parlamentlərarası dostluq qrupunun fəaliyyət göstərdiyini həmsöhbətinin diqqətinə çatdıraraq, iki ölkənin parlamentləri arasında əlaqələrin inkişaf etdirilməsi üçün yeni seçilmiş CAR parlamentində də CAR-Azərbaycan dostluq qrupunun yaradılmasını təklif edib və bunun ikitərəfli əlaqələrinin möhkəmləndirilməsinə daha böyük töhfələr verə biləcəyini deyib.
O, ölkəmizdə aparılan demokratik, hüquqi, iqtisadi islahatlar sahəsində qazanılmış nailiyyətlərdən söz açaraq, 44 günlük müharibədə Azərbaycanın şanlı Qələbəsindən sonra Prezident İlham Əliyevin rəhbərliyi ilə həyata keçirilən dövlət siyasətinin mühüm istiqamətini təşkil edən işğaldan azad olunmuş ərazilərdə reallaşdırılan genişmiqyaslı bərpa-quruculuq işləri, habelə müasir sosial-mədəni infrastrukturun qurulması, eləcə də kommunikasiya və nəqliyyat xətlərinin bərpası haqqında məlumat verib. Minalanmış ərazilərin Azərbaycanın hazırda üzləşdiyi ən ciddi problemlərdən biri olduğunu dilə gətirən H.Rəhimli bunun bölgədə həm sülh prosesinə mane olduğunu, həm də mədəni irsə ciddi ziyan vurduğunu bildirib. O, Azərbaycanın faktiki olaraq mina terroruna məruz qaldığını, bununla əlaqədar hazırda respublikamızda mina terrorunun qurbanlarının artdığını diqqətə çatdırıb, eləcə də ölkəmizin üzləşdiyi mina təhlükəsi ilə bağlı ətraflı məlumat təqdim edib. Azərbaycanlı diplomat qeyd edib ki, mina problemi ümumi terrorla mübarizə sahəsinə aid olduğu üçün təkcə ölkəmizin problemi sayıla bilməz və bundan irəli gələrək sözügedən məsələdə beynəlxalq ictimaiyyətin səylərinə, o cümlədən parlamentlərarası əməkdaşlığın keyfiyyətcə yeni mərhələsi olan parlament diplomatiyası xətti ilə CAR-ın dəstəyinə ehtiyac duyulur.
A.Lotriet ərazilərin minalanmasının insanlara qarşı qəbuledilməz olduğunu bildirib. Eyni zamanda, o, söhbət zamanı müzakirə olunan bütün məsələləri parlamentin rəhbərinə məruzə edəcəyini və onunla məsləhətləşmə aparacağını deyib.
Görüş zamanı hər iki ölkənin BMT, Qoşulmama Hərəkatı və sair mühüm beynəlxalq təşkilatlar çərçivəsində sıx əməkdaşlıq etməsi dövlətlərimiz üçün mühüm əhəmiyyət kəsb edən beynəlxalq məsələlərdə mövqelərin qarşılıqlı dəstəklənməsinin bariz nümunəsi kimi vurğulanıb. Söhbətdə beynəlxalq məsələlər də diqqət mərkəzində olub, hər iki ölkənin üzləşdiyi problemlərin qarşılıqlı əməkdaşlıq müstəvisində həllinin əhəmiyyəti vurğulanıb.
Daha sonra CAR parlamentinin Afrika qitəsində ən böyük və zəngin kitabxanaya malik olduğu nəzərə alınaraq, Azərbaycan həqiqətləri, onun qədim tarixi və zəngin mədəniyyətindən bəhs edən kitablar və məlumatlar A.Lotrietə təqdim edilib.
H.Rəhimli CAR parlamentinin Beynəlxalq əlaqələr komitəsinin sədri Supra Mahumapelo ilə də görüşüb. Söhbət zamanı iki ölkənin dövlət başçılarının səyləri nəticəsində siyasi dialoqun yüksək səviyyədə olduğu qeyd edilib, hər iki ölkədə keçirilən parlament seçkilərindən sonra parlamentlərarası münasibətlərin də həmin səviyyədə inkişaf etdirilməsinin zəruriliyi vurğulanıb. Tərəflər çoxşaxəli əməkdaşlıq gündəliyinin inkişafında parlament diplomatiyasının, habelə parlament nümayəndələrinin qarşılıqlı səfərlərinin həyata keçirilməsinin, eləcə də sözügedən sahədə təcrübə mübadiləsinin əhəmiyyətli rol oynaya biləcəyini xüsusi qeyd ediblər.
S.Mahumapelonun sözlərinə görə, parlamentlərimiz arasında getdikcə daha da intensiv əlaqələrin qurulması xalqlarımızın münasibətlərinin hərtərəfli inkişafı üçün yaxşı zəmin yarada və beləliklə gələcəkdə öz bəhrəsini verə bilər. O, CAR-ın Milli Assambleyasının Azərbaycan parlamenti ilə əməkdaşlıq etməyə hazır olduğunu vurğulayaraq, yaxın gələcəkdə həm özünün, həm də parlament rəhbərliyi səviyyəsində nümayəndə heyətinin Azərbaycana səfər etməsini müsbət qiymətləndirib.
Bölmənin digər xəbərləri
