AZƏRBAYCAN CƏMİYYƏTİNİN DEMOKRATİKLƏŞMƏSİ PROSESİNDƏ YERLİ ÖZÜNÜİDARƏETMƏ ORQANLARININ ROLU GÜCLƏNDİRİLƏCƏKDİR
Tədbirdə Xaçmaz, Dəvəçi, Siyəzən, Quba, Xızı, Qusar rayonlarının icra hakimiyyəti, bələdiyyə, məhkəmə, hüquq mühafizə orqanlarının, kütləvi informasiya vasitələrinin nümayəndələri iştirak etmişdir.
Seminar-müşavirəni Quba Rayonu İcra Hakimiyyətinin başçısı Ərziman Əliyev açmışdır. Sonra məruzələrlə çıxış edən Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsinin bələdiyyələrlə iş sektorunun müdiri Ramiq Həşimov, Azərbaycan Respublikasının İnsan Hüquqları üzrə Müvəkkili (Ombudsman) Elmira Süleymanova, Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə və Mərkəzi Seçki Komissiyasının üzvü Tamam Cəfərova bildirmişlər ki, müstəqil Azərbaycan Respublikasının ümummilli lider Heydər Əliyevin rəhbərliyi ilə hazırlanmış və 1995-ci il noyabrın 12-də ümumxalq səsverməsi - referundum yolu ilə qəbul olunmuş Konstitusiyasında ölkəmizdə ilk dəfə olaraq yerli özünüidarəetmə orqanı - bələdiyyə institutunun da yaradılması təsbit edilmişdir. Məruzəçilər vurğulamışlar ki, ulu öndərimiz Azərbaycanda qeyri-dövlət, tam müstəqil yerli özünüidarə orqanlarının yaradılmasını, həm də demokratiyanın inkişafı, ölkənin idarə olunmasında vətəndaşlarımıza imkanlar yaradılmasının göstəricisi kimi qiymətləndirirdi. Avropa Şurasının “Yerli özünüidarə haqqında 15 oktyabr 1985-ci il Xartiyası”nda və “Bələdiyyələrin statusu haqqında” Azərbaycan Respublikası Qanununda əks olunduğu kimi, müəyyən ərazi vahidinin hüdudları daxilində özünüidarəni həyata keçirən, seçkilər əsasında yaradılan bələdiyyələr elə bir qeyri-dövlət sistemidir ki, yerli əhəmiyyətli məsələləri müstəqil və sərbəst həll etmək hüququnu həyata keçirir, əhalinin mənafeyi naminə dövlət işlərinin bir hissəsini öz üzərinə götürərək yerinə yetirir. Ümummilli liderimizin bu istiqamətdə tövsiyələrini rəhbər tutan Azərbaycan dövlətinin siyasi rəhbərliyinin demokratik dəyərlərə söykənən cəmiyyət quruculuğu prosesində bələdiyyələrin önəmli roluna böyük əhəmiyyət verdiyini bildirən natiqlər, təqdirəlayiq hal kimi xüsusi vurğulamışlar ki, ölkəmizin hər yerində geniş vüsət alan tikinti-abadlıq, quruculuq işlərində, yerli əhəmiyyətli sosial problemlərin həllində bələdiyyələrin də özünəməxsus rolu vardır.
Məruzələrdə oktyabrın 6-a təyin edilmiş bələdiyyə seçkilərinin yüksək səviyyədə keçirilməsinə xüsusi diqqət verilmiş, Azərbaycan Prezidenti İlham Əliyevin Milli Məclisə seçkilərlə bağlı 2005-ci il 11 may və 25 oktyabr tarixli sərəncamlarının müddəalarının yerinə yetirilməsi baxımından yerli icra, bələdiyyə, məhkəmə, hüquq mühafizə orqanlarının vəzifələrindən ətraflı bəhs olunmuşdur.
Seminar-müşavirədə bələdiyyələrin işindəki nöqsanlardan danışılmışdır. Məsələn, bildirilmişdir ki, bələdiyyə torpaqlarından istifadə, maliyyə-təsərrüfat fəaliyyəti, vergilərin toplanması sahəsində qanunsuzluqlara yol verilir. Bütün bunlar hələ də bir çox bələdiyyələrin öz səlahiyyətlərini yetərincə bilməməsindən, bələdiyyə sədrlərinin vəzifələrinə məsuliyyətlə yanaşmamasından, təkbaşına qərarlar qəbul etməsindən irəli gəlir.
Sonra seminar-müşavirədə bələdiyyə üzvləri ilə açıq, işgüzar fikir mübadiləsi aparılmış, qarşıya çıxan və həlli vacib olan məsələlər, mövcud çətinliklər barədə səmərəli söhbət getmiş, qarşıdan gələn seçkilərin azad, demokratik keçirilməsi üçün ayrı-ayrı rayonlarda görülən işlər haqqında məlumat verilmiş, maraq doğuran suallara aydınlıq gətirilmişdir.
Ramiq Həşimov seminar-müşavirəyə yekun vurmuş, müzakirələrdə səslənmiş səmərəli təklif və tövsiyələrin Azərbaycan Respublikası Prezidentinin İcra Aparatının regional idarəetmə və yerli özünüidarəetmə orqanları ilə iş şöbəsində və digər əlaqədar qurumlar tərəfindən diqqətlə təhlil olunacağını bildirmişdir.
Bölmənin digər xəbərləri
