Bakı, 26 noyabr, AZƏRTAC

COP29 Azərbaycanın həm təşkilatçılıq bacarığına, həm də iqlim dəyişikliyi ilə mübarizədə prinsipial mövqeyinə görə seçildi. Konfransın uğurlu nəticələri Azərbaycanın qlobal çağırışlara çevik cavab verə bilmək və müxtəlif səviyyələrdə səmərəli əməkdaşlıq qurmaq qabiliyyətini bir daha sübut etdi. Bütün maneələrə baxmayaraq, COP29 iqlim siyasəti tarixində mühüm dönüş nöqtəsi oldu və bu uğurun təməlində Azərbaycanın məqsədyönlü fəaliyyəti dayanır.

Bu fikirləri AZƏRTAC-a açıqlamasında Beynəlxalq Avrasiya Mətbuat Fondunun vitse-prezidenti Oğuz Mirzəyev söyləyib.

Onun sözlərinə görə, konfransın əvvəlində bəzi maraqlı tərəflərin təzyiqləri və əməkdaşlıqdan yayınma cəhdləri COP29-un effektiv keçməsi üçün ciddi maneələr yaratdı. Lakin Azərbaycan nümayəndə heyətinin diplomatik ustalığı və çevik yanaşması sayəsində bu maneələr dəf edildi. COP29 çərçivəsində Azərbaycanın qlobal problemlərin həllindəki rolu bir daha vurğulandı. Qəbul edilmiş qərarlar Azərbaycanın təşəbbüsü ilə formalaşan “ədalətli iqlim keçidi” prinsipinə əsaslanır və bu, xüsusilə inkişaf etməkdə olan ölkələrə maliyyə və texnoloji dəstəyin artırılmasını nəzərdə tutur. Bu yanaşma, bir tərəfdən iqlim dəyişikliyinin mənfi təsirlərinin aradan qaldırılmasına yardım edir, digər tərəfdən isə ölkələr arasında həmrəyliyi gücləndirir.

Konfrans iştirakçılarının Azərbaycanın külək və günəş enerjisi potensialını beynəlxalq ictimaiyyətə təqdim etməsini yüksək qiymətləndirdiyini vurğulayan O.Mirzəyev deyib: “COP29 çərçivəsində imzalanan müqavilələr və tərəfdaşlıq razılaşmaları ölkəmizin enerji sektorunda dayanıqlılıq və innovasiya ilə bağlı strateji planları həyata keçirmək üçün mühüm təkan olacaq. Bununla yanaşı, Azərbaycanın yaşıl enerji istehsalında və ixracında regional lider kimi mövqeyini gücləndirən təşəbbüsləri konfransın mühüm nailiyyətlərindən biri kimi qiymətləndirildi. COP29 çərçivəsində Azərbaycanın liderliyi ilə regionda karbon emissiyalarını azaldan multimodal nəqliyyat şəbəkəsinin inkişafı üçün yeni proqramlar təqdim olundu. Bu təşəbbüs Xəzər hövzəsi və Mərkəzi Asiyanı əhatə edən ekoloji cəhətdən səmərəli nəqliyyat dəhlizlərinin yaradılmasına yönəldi”.

O.Mirzəyev qeyd edib ki, Azərbaycan COP29-da beynəlxalq ictimaiyyətin diqqətini ölkənin yalnız iqlim dəyişikliyinə qarşı mübarizədə deyil, həm də humanitar sahədəki səylərinə yönəltdi. Konfrans çərçivəsində Azərbaycan ekoloji fəlakət zonalarında yaşayan insanların hüquqlarının qorunmasına və onların yaşayış şəraitinin yaxşılaşdırılmasına dair xüsusi təşəbbüslərlə çıxış etdi. Bu təşəbbüslər xüsusilə, iqlim dəyişikliyindən əziyyət çəkən icmalar üçün sosial ədalət prinsipinin təmin olunmasına yönəldi və bu, beynəlxalq səviyyədə geniş dəstək qazandı.

“Bütün bu uğurlar Azərbaycanın beynəlxalq səviyyədə artan nüfuzunu bir daha təsdiq edir. Azərbaycan yalnız konfransın texniki və təşkilati tərəflərini mükəmməl şəkildə təmin etməklə kifayətlənmədi, həm də qlobal problemlərin həllində liderliyi ilə seçildi. Ölkəmiz bir daha sübut etdi ki, həm milli maraqlar, həm də beynəlxalq öhdəliklər arasında tarazlığı qorumaq mümkündür. COP29 Azərbaycan üçün yalnız diplomatik uğur deyil, həm də gələcək nəsillər üçün dayanıqlı, yaşıl və innovativ iqtisadiyyat qurmaq üçün möhkəm təməl oldu”, - deyə o bildirib.