Bakı, 25 oktyabr, AZƏRTAC

Azərbaycan Cüdo Federasiyası (ACF) ilk dəfə kəmər dərəcələri üzrə rəsmi imtahan təşkil edib.

Federasiyanın mətbuat xidmətindən AZƏRTAC-a verilən məlumata görə, rəsmi kəmər imtahanlarının keçirilməsi idmançıların cüdo texnikalarını hərtərəfli öyrənməsi, həmçinin onların motivasiyası üçün mühüm əhəmiyyət kəsb edir.

ACF-nin idman direktoru Kamran Talıbov bildirib ki, kəmər dərəcələri üzrə rəsmi imtahanın keçirilməsi Azərbaycan cüdo tarixində bir ilkdir: “Bu imtahanda 140 idmançı iştirak edib. Təcrübəli münsiflər heyəti tərəfindən şəffaf şəkildə qiymətləndirmə keçirilir. Gənc idmançılar üçün bu imtahan onların yeni başlayan idman karyeralarının bünövrəsini təşkil edir və həvəsləndirici qüvvə rolunu oynayır. Qeyd edim ki, 2025-ci ildən etibarən yalnız kəmər dərəcələri olan idmançılar rəsmi daxili yarışlarda iştirak etmək hüququ qazanacaqlar”.

Türkiyə Cüdo Federasiyasının təhsil üzrə direktoru və Avropa Cüdo Birliyinin kata komissiyasının üzvü Mehmet Yılmaz ACF-i bu təşəbbüsə görə təbrik edərək bildirib ki, imtahanın təşkil standartları ən yüksək səviyyədədir: “Beynəlxalq Cüdo Federasiyasında və Avropa Cüdo Birliyində “kata” imtahanları və kəmər imtahanları bu formada təşkil edilir. Cüdoya yeni başlayan idmançıların gələcəkdə təhsil sahəsində inkişafı üçün Avropa Cüdo Birliyinin ən son tətbiq etdiyi qaydalara uyğun imtahan verməsi çox önəmlidir. Gələcəkdə Azərbaycan cüdosunda təhsil sahəsində və “kata”da çox mühüm inkişaf olacaq. Azərbaycan cüdoçularının gələcək illərdə “kata” sahəsində də Avropa və Dünya çempionatlarında nəticə əldə edəcəklərinə əminəm”.

Federasiyadan bildirilib ki, kəmər imtahanlarının keçirilməsində əsas məqsəd cüdonun ölkəmizdə fundamental, keyfiyyətli inkişafını təmin etmək və beynəlxalq standartlara uyğunlaşdırmaqdır. Yaxın zamanlarda ölkənin müxtəlif regionlarında kəmər imtahanlarının təşkil edilməsi planlanır.