Bakı, 27 oktyabr, AZƏRTAC

Bu il sentyabrın 16-19-da Amerika Birləşmiş Ştatlarının Nyu-York şəhərində Birləşmiş Millətlər Təşkilatının Baş Assambleyasının 78-ci sessiyası çərçivəsində “Dayanıqlı İnkişaf Məqsədləri (DİM) Hərəkət Həftəsonu” (“SDG Action Weekend”) və “Dayanıqlı İnkişaf Məqsədləri Sammiti 2023” keçirildi. Həmin Sammitdə iştirak etmək məqsədilə Azərbaycan xarici işlər nazirinin rəhbərlik etdiyi nümayəndə heyətini formalaşdıraraq tədbirdə yüksək səviyyədə təmsil olundu. Sammitdə BMT-nin Baş katibi Antonio Quterreşin dövlət və hökumət başçılarına xüsusi çağırışı oldu. Müraciəti zamanı o, “İnsanlar və Planet üçün Xilasetmə Planı”nın hazırlanmasını, Dayanıqlı İnkişaf Məqsədlərinin ilk beş məqsədinə (DİM1 - Yoxsulluğa son, DİM2 - Aclığa son, DİM3 - Yaxşı səhiyyə və rifah, DİM4 - Keyfiyyətli təhsil, DİM5 - Gender bərabərliyi) xüsusi diqqət yetirilməli, tədbirlər həyata keçirilməli olduğunu diqqətə çatdırdı.

Sammitin yekunu olaraq Dayanıqlı İnkişafa dair Yüksək Səviyyəli Siyasi Forumda (DİYF) dünya liderlərinin 2030-cu il Gündəliyinə və DİM-lərin həyata keçirilməsinə sadiqliyini bir daha təsdiq edən Siyasi Bəyannamə qəbul edildi, üzv dövlətlər Sammitdə səsləndirilən məqsədlərə çatmaq üçün əllərindən gələni edəcəklərinə dair öhdəlik götürdülər.

Azərbaycan da öz növbəsində hər dəfə BMT tərəfindən qəbul olunan qərarlara diqqətlə yanaşır, bu qərarlardan irəli gələn tövsiyə və götürülmüş öhdəliklərin ölkə Konstitusiyası və reallıqlarına uyğun həyata keçirilməsində nümunəvi dövlət olaraq çıxış etmişdi. Azərbaycan nümayəndə heyətinin Sammitin işində uğurlu iştirakı, çıxışları, eləcə də Sammit çərçivəsində həyata keçirdiyi qarşılıqlı görüşləri qlobal sənədin icrasında BMT ilə gələcək əməkdaşlığın daha da inkişaf etdirilməsi üçün müxtəlif imkan və faydalar yaradacaqdır.

Bu fikirləri AZƏRTAC-a açıqlamasında Milli Məclisin deputatı Məzahir Əfəndiyev bildirib.

Onun sözlərinə görə, Azərbaycan Hökuməti qlobal müzakirələri və DİM Sammitinin Siyasi Bəyannaməsini geniş şəkildə dəstəkləmiş və 2022-2026-cı illər üçün Sosial-İqtisadi İnkişaf Strategiyasına, işğaldan azad edilmiş ərazilərə Böyük Qayıdış Dövlət Proqramına, Kompleks Milli Maliyyələşdirmə Çərçivələrinin (KMMÇ) və Azərbaycanın Mərkəzi Bankının Dayanıqlı Maliyyə Yol Xəritəsinin tətbiqi üzrə milli səylərə əsaslanan DİM-in transformasiyası üzrə Milli öhdəliyini təqdim etmişdir.

Deputat qeyd edib ki, sentyabr ayında keçirilən Sammitdən irəli gələrək keçdiyimiz günlərdə Bakı şəhərində 3-cü Dayanıqlı İnkişaf Məqsədləri Dialoqu təşkil olundu. Dialoq, eyni zamanda, BMT üçün xüsusi olan 24 oktyabr - “BMT Günü”ndə təşkil edildi. Tədbirin məhz o tarixə təsadüf etməsində məqsəd bir tərəfdən “BMT Günü”nün qeyd olunmasında Azərbaycan Hökumətinin yüksək hörmətinin, diqqətinin, digər tərəfdən də BMT tərəfindən qəbul olunan universal sənədlərin icrasında etibarlılığını nümayiş etdirmək idi.

“DİM dialoqları seriyası Azərbaycanın 2030-cu ilədək Dayanıqlı İnkişaf Sahəsinə dair Strategiyası və 2030-cu il gündəliyi çərçivəsində milli prioritetlərin həyata keçirilməsində Azərbaycan Hökumətinə dəstək göstərmək məqsədilə biliklərin artırılması, qabaqcıl beynəlxalq təcrübələrin tətbiq edilməsi və innovativ həllərin təmin edilməsində əsas maraqlı tərəflər - Hökumət, BMT, özəl sektor, vətəndaş cəmiyyəti, Beynəlxalq Maliyyə İnstitutları və inkişaf tərəfdaşları üçün platforma rolunu oynamağı hədəfləyir. Hər bir DİM dialoqu əsas diqqətini konkret mövzuya yönəldir və dialoqdan sonra bu mövzu üzrə konseptual yanaşma, məlumatların qısa təhlilinin və qabaqcıl beynəlxalq təcrübə nümunələrinin yer aldığı analitik qeyd, həmçinin mövzu ilə bağlı praktiki siyasət tövsiyələrinin irəli sürüldüyü bölmə işlənib hazırlanır. Ötən ilin noyabrında DİM dialoqu seriyasının başlanmasından ötən müddət ərzində iki DİM dialoqu keçirilib. Birincisi, “Azərbaycanda Yaşıl Transformasiya” və ikincisi, “2030-cu ilə doğru: Azərbaycanda Sosial-İqtisadi İnklüzivlik” adlanır. Bu il keçirilən 3-cü DİM dialoqu da DİM Sammiti müzakirələrindən əldə edilən fikirləri bölüşmək və Azərbaycanda DİM-in sürətləndirilməsi və maliyyələşdirilməsi üçün atılacaq növbəti addımların həyata keçirilməsini hədəfləyib”, - deyə Məzahir Əfəndiyev diqqətə çatdırıb.

O qeyd edib ki, bunlarla yanaşı, nəinki BMT Baş Assambleyasının, eyni zamanda, qurumun alt strukturlarının Dayanıqlı İnkişaf Məqsədlərinə çatmaları üçün istər ölkə daxilində, istərsə də təşkil olunmuş digər beynəlxalq konfranslarda Azərbaycanın nümayəndə heyətləri çox yüksək səviyyədə təmsil olunur. Bu il Birləşmiş Millətlər Təşkilatının Əhali və İnkişaf Komissiyasının əsas tədbiri olan, BMT-nin Avropa İqtisadi Komissiyası (UNECE) və BMT-nin Əhali Fondunun (UNFPA) birgə təşkil etdiyi, Cenevrədə keçirilən regional konfransda da Azərbaycanın nümayəndə heyəti, o cümlədən Milli Məclis də yüksək səviyyədə təmsil olundu. Hər bir platformada ölkəmizin uğurlu iştirakçılığı Azərbaycanın hər zaman qlobal çağırışlara həssaslıqla və böyük hörmətlə yanaşdığını, əldə olunan nailiyyətlərini və bu sahədə həyata keçirilən bütün tədbirləri dünya ictimaiyyətinə nümayiş etdirir. Bu gün Azərbaycanın qarşısında duran əsas məsələ Cənubi Qafqazda davamlı sülhü təmin etmək, Böyük Qayıdış və xalqların reinteqrasiya prosesini həyata keçirməklə tezliklə doğma Qarabağımızın bərpasını, habelə bütün xalqların sülh və rifah içində firavan yaşamasını təmin etməkdir.