Azərbaycan diaspor təmsilçisi Norveç qəzetində yayılan yalanları ifşa edib
Stokholm, 13 aprel, Rauf Əliyev, AZƏRTAC
Azərbaycan diaspor təmsilçisi Norveç qəzetində yayılan yalanları ifşa edib.
AZƏRTAC-ın xüsusi müxbiri xəbər verir ki, “Klassekampen” qəzetində çıxan məqalədə “Azərbaycan Dağlıq Qarabağda yeni hücumlar həyata keçirir” adlı məqaləyə etirazını bildirən “CAN” diaspor təşkilatının sədri Şervin Nəcəfpur cavab məqaləsini dərc etdirib.
Uzun illər davam etmiş Qarabağ münaqişəsinin tarixi fonunu ilkin məqalədə təhrif etməkdə günahlandıran diaspor nümayəndəmiz, Ermənistanın Azərbaycanın beynəlxalq səviyyədə tanınmış keçmiş Dağlıq Qarabağ kimi tanınan ərazisinin 20 faizini uzun illər işğal etməsini təəssüf hissi ilə ifadə edib. Baş vermiş işğal nəticəsində on minlərlə insanın qətlə yetirildiyini və 800 mindən çox azərbaycanlının doğma evlərindən qovulduğunu bildirib.
Bütün baş verən dəhşətlərin BMT Təhlükəsizlik Şurasının dörd qətnaməsinə rəğmən xalqımızın başına gətirildiyi qeyd edilən məqalədə, 30 ilə yaxın nəticəsiz davam edən danışıqların 2020-ci ildə hər iki tərəfin minlərlə insanın həyatına son qoyan müharibəyə gətirdiyi deyilir.
İkinci Qarabağ müharibəsi zamanı Ermənistan Azərbaycanın ikinci böyük şəhəri Gəncəyə üç ballistik raket zərbəsi endirilməsi faktı ilə yanaşı, kasetli sursatlar ilə Bərdə şəhərinə hücum hallarının baş verməsi də mətndə diqqətə çatdırılır. “Hər iki şəhər hərbi bazalardan uzaqda yerləşir və bu hücumlar “Human Rights Watch” və digər müstəqil təşkilatlar tərəfindən pislənərək sənədləşdirilib. Lakin Ermənistanın hərbi cinayətləri qəsdən nəzərə alınmır və bu kimi zorakılıqlar edən tərəf gözümüzün qarşısında zərərçəkmiş kimi qələmə verilir”, - deyə məqalədə bildirilir.
Norveçdə media istehlakçılarının Qarabağ münaqişəsi ilə bağlı adekvat məlumat azlığı yaşadığını qeyd edən Şervin Nəcəfpur, məsələni birtərəfli şəkildə təqdim olunma faktlarını gətirərək yazıb: “Müstəqil bir jurnalist balanslaşdırılmış məqalə hazırlayaraq orada həm Ermənistandan, həm də Azərbaycandan olan bir ailənin müsahibəsini təqdim edərdi. O zaman media istehlakçıları özləri bu haqda fikir formalaşdıra bilərdilər, lakin bunun əvəzinə jurnalist Qarabağla bağlı faktları, məsələn, ərazinin 30 ilə yaxın işğal altında olması kimi faktları bilərəkdən dilə gətirməyib”.
İşğaldan azad edilən ərazilərdə çoxlu sayda minanın basdırıldığına diqqət çəkən Şervin Nəcəfpur məqalədə bildirib: “Beynəlxalq ekspertlərin fikrincə, minalardan təmizləyərək bu ərazinin insanlar üçün təhlükəsiz etmək 10-15 il vaxt tələb edəcək, bununla yanaşı, Ermənistan hələ də bir çox mina xəritələrini verməkdən imtina edir. Bu, həm də o deməkdir ki, ərazinin yenidən qurulması və məcburi köçkünlərin yenidən bu ərazilərdə təhlükəsiz şəkildə məskunlaşdırılması prosesi 20 ildən çox vaxt apara bilər".
Qarabağda hazırda yeni yol, məktəb, xəstəxana, evlər və daha bir çox dağıdılmış şəhər və kəndlərin yenidən tikilməli olduğuna diqqət yetirildiyi məqalədə, bunun həm vaxt, həm də resurs tələb etdiyi vurğulanır.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
