Azərbaycan diasporu Amsterdam Müstəqil Universitetinin rəhbərliyinə etiraz bəyanatı ünvanlayıb
Bakı, 4 noyabr, AZƏRTAC
Azərbaycan-Türk Kültür Mərkəzi Niderland Krallığının paytaxtındakı Amsterdam Müstəqil Universitetində erməni lobbisinin planlaşdırdığı tədbirlə əlaqədar ali təhsil ocağının rəhbərliyinə bəyanat göndərib. Bu ölkədəki erməni diasporu noyabrın 7-də universitetdə qondarma “Dağlıq Qarabağ respublikası”na həsr olunmuş “Tanınmamış ölkələr, problemin həlli nədir?” adlı seminar keçirməyi, tədbirə separatçı rejimin “millət vəkili” Armen Sarkisyanı dəvət etməyi planlaşdırır.
Diasporla İş üzrə Dövlət Komitəsindən AZƏRTAC-a bildiriblər ki, Azərbaycan-Türk Kültür Mərkəzi bununla bağlı Amsterdam Müstəqil Universitetinin rəhbərliyinə etiraz məktubu ünvanlayaraq, qondarma “Dağlıq Qarabağ respublikası”nın Azərbaycanın işğal olunmuş torpaqlarında yaradıldığını diqqətinə çatdırıb. Bildirilib ki, Ermənistan tərəfindən Azərbaycanın 7 rayonu işğal edilib, minlərlə insan öldürülüb, bir milyon azərbaycanlı doğma yurdundan qovulub.
Bəyanat müəllifləri separatçı kriminal rejimin nümayəndəsinin Amsterdam universitetində çıxışının Niderland Krallığında yaşayan azərbaycanlılarda dərin təəssüf və qəzəb hissi doğuracağını bildiriblər.
Yerli ictimaiyyəti Dağlıq Qarabağdakı separatçı rejimə qucaq açmamağa çağıran diasporumuzun nümayəndələri ümid edirlər ki, universitetin müəllim və professor heyəti Azərbaycanın ərazi bütövlülüyü prinsipinə hörmətlə yanaşaraq, işğalçı rejimin nümayəndələrinə çıxış üçün şərait yaratmayacaq.
Bölmənin digər xəbərləri
