Azərbaycan Dövlət Bədən Tərbiyəsi və İdman Akademiyasında videodərslərin tədrisinə başlanılıb
Bakı, 11 yanvar, AZƏRTAC
Azərbaycan Dövlət Bədən Tərbiyəsi və İdman Akademiyası (ADBTİA) “İdman menecmenti və kommunikasiya”, “Məşqçilik”, “Bədən tərbiyəsi və idmanda reabilitasiya”, “Fiziki tərbiyə və çağırışaqədərki hazırlıq müəllimliyi” üzrə ixtisaslaşan tələbələrin bilik və bacarıqlarının artırılması istiqamətində daha bir yenilik edib.
ADBTİA-dan AZƏRTAC-a verilən məlumata görə, Akademiyanın nəzdində fəaliyyət göstərən Multimedia mərkəzində (Tədris studiyası) tədris olunan fənlər üzrə qısa müddətdə videodərslər hazırlanaraq tələbələrin istifadəsinə verilib. Bütün kafedralar üzrə professor-müəllim heyəti tərəfindən keçirilən dərslərdə toxunulan əsas mövzulara dair mühazirələr slayd formatda təqdim olunub. Artıq 70-dən çox videodərs hazırlanaraq Akademiyanın rəsmi “YouTube” kanalına hissə-hissə yüklənilir. Bununla da tələbələr mövcud karantin şərtləri ilə əlaqədar onlayn dərslərdə iştirak edərək yeni biliklərə yiyələnirlər.
Qeyd edək ki, bu resurslardan Akademiyanın tələbələri ilə yanaşı, idman ixtisasını seçən, idman sahəsində biliklərini artırmaq istəyən şəxslər də istifadə edə bilərlər.
Bölmənin digər xəbərləri
