AZƏRBAYCAN DRES-İ QIŞA HAZIRDIR
Ölkəmizin ən böyük enerji istehsalçısı olan Azərbaycan Dövlət Rayon Elektrik Stansiyasının beş blokunda cari və əsaslı təmir işləri başa çatdırılmış, bloklardan hər birinin gücü 10-20 meqavat artmışdır. Dördüncü blokun yenidən qurulması üçün Rusiyanın Sankt-Peterburq şəhərindən lazımi avadanlıq və ehtiyat hissələri alınıb gətirilmişdir. Stansiyada gündəlik istehsal gücü 1620 meqavata çatmışdır. Bu da ötən ildəkindən xeyli çoxdur.
Stansiyanın direktoru İlyas Məmmədov AZƏRTAC-ın müxbirinə bildirmişdir ki, təxminən 15 min nəfərin yaşadığı energetiklər qəsəbəsində mənzillərin fasiləsiz qızdırılması təmin edilmiş, “Kür” elektrik paylayıcı yardımçı stansiyası təmir olunmuş, qəsəbəyə elektrik enerjisi verilməsinin etibarlılığını artırmaq məqsədi ilə təzə transformator alınmışdır.
İlk dəfə olaraq, bu mövsümdə stansiyanın işçiləri xüsusi iş paltarı ilə təmin edilmişlər.
ƏDLİYYƏ İŞÇİLƏRİNİN YARDIMI
Mingəçevirin ədliyyə işçiləri peşə bayramlarını şəhərdəki sənaye məhsulları kombinatının binasında müvəqqəti məskunlaşmış məcburi köçkün ailələri ilə birlikdə qeyd etmişlər. Onlar öz vəsaitləri hesabına aldıqları ərzaq məhsulları və uşaq geyimlərindən ibarət bağlamaları köçkün soydaşlarımıza paylamış, köçkünlərin qayğı və problemləri ilə maraqlanmış, 10 ailəni daimi himayəyə götürmüşlər.
Ədliyyə işçilərinin və ictimaiyyət nümayəndələrinin toplantısında şəhər məhkəməsinin sədri Rüfət Həmidov “Heydər Əliyev müstəqil Azərbaycan ədliyyəsinin qurucusudur” mövzusunda məruzə etmişdir.
Bölmənin digər xəbərləri
