“Azərbaycan əczaçılıq sənayesi: Dünən, bu gün və sabah” - II Beynəlxalq Konfrans VİDEO
Bakı, 4 may, AZƏRTAC
Heydər Əliyev Mərkəzində “Azərbaycan Əczaçı İstehsalçılar Assosiasiyası” İctimai Birliyi, Səhiyyə Nazirliyi, İqtisadiyyat Nazirliyi və Macarıstanın ölkəmizdəki səfirliyinin dəstəyi ilə “Azərbaycan əczaçılıq sənayesi: Dünən, bu gün və sabah” adlı II Beynəlxalq Konfrans keçirilib.
AZƏRTAC xəbər verir ki, konfransda dövlət qurumlarının nümayəndələri, xarici ekspertlər və yerli əczaçılıq sənayesi istehsalçıları bir araya gələrək Azərbaycanın əczaçılıq sektorunun mövcud vəziyyəti, inkişaf perspektivləri, yerli istehsalın gücləndirilməsi istiqamətləri, eləcə də qabaqcıl beynəlxalq təcrübənin tətbiqi imkanları ətrafında geniş çıxışlar edib və müzakirələr aparıblar.
Konfransın açılışında çıxış edən səhiyyə naziri Teymur Musayev əczaçılıq sənayesinin keçdiyi inkişaf yoluna toxunaraq bildirib: “Ümummilli Lider Heydər Əliyevin rəhbərliyi dövründə Azərbaycanda əczaçılıq sahəsinin institusional əsasları formalaşdırılıb, ilk istehsal müəssisələri yaradılıb”.
Nazir vurğulayıb ki, bu gün Prezident İlham Əliyevin rəhbərliyi altında ölkədə bütün sahələrdə olduğu kimi, səhiyyə və əczaçılıq sektorunda da mühüm nailiyyətlər əldə olunur.
Teymur Musayev qeyd edib ki, yerli əczaçılıq sənayesinin inkişafı istiqamətində həyata keçirilən islahatlar, sənaye parklarının yaradılması, xarici investisiyaların cəlb olunması və regionlarda, o cümlədən işğaldan azad edilmiş ərazilərdə müasir istehsal müəssisələrinin qurulması bu sahənin dayanıqlı inkişafını təmin edir. Nazir çıxışında rəqəmsallaşmanın əhəmiyyətini də xüsusi qeyd edib: “Elektron resept sistemi, dərman vasitələrinin Təqib və İzləmə Sistemi kimi rəqəmsal həllər şəffaflığın artırılmasına, nəzarət mexanizmlərinin gücləndirilməsinə və idarəetmənin daha effektiv təşkilinə xidmət edir”.
Daha sonra Milli Məclisin Səhiyyə komitəsinin sədri Əhliman Əmiraslanov, Macarıstanın Azərbaycandakı səfiri Tamaş Yojef Torma, iqtisadiyyat nazirinin müavini Səməd Bəşirli və İqtisadiyyat Nazirliyi yanında Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov çıxış edərək, ölkədə əczaçılıq sənayesinin dayanıqlı inkişafı üçün yerli istehsalın gücləndirilməsi, əhalinin təhlükəsiz və effektiv dərman vasitələri ilə təminatı, bu sahədə dövlət–özəl sektor əməkdaşlığının genişləndirilməsi, innovativ texnologiyaların tətbiqi, beynəlxalq təcrübənin mənimsənilməsi və keyfiyyət standartlarının yüksəldilməsinin vacibliyini qeyd ediblər.
Tədbirdə “Əczaçılıq sənayesinin gələcəyində rəqəmsallaşma və süni intellektin rolu” panel müzakirəsi xüsusi diqqət mərkəzində saxlanılıb.
Səhiyyə nazirinin müşaviri Rüfət Hacıəlibəyov panel sessiyasında çıxış edərək bildirib ki, səhiyyə sahəsinin rəqəmsallaşdırılması Səhiyyə Nazirliyinin fəaliyyətində əsas prioritet istiqamətlərdən birini təşkil edir: “Səhiyyə sektorunun rəqəmsal transformasiya strategiyası çərçivəsində nazirlik tərəfindən Vahid Səhiyyə İnformasiya Sistemi (VSİS) yaradılıb və uğurla tətbiq olunur”.
Rüfət Hacıəlibəyov, həmçinin vurğulayıb ki, əczaçılıq sektorunun rəqəmsallaşdırılmasına 2023-cü ildən başlanılıb:“Tətbiq edilən bu sistemlərin əsas məqsədi dərman dövriyyəsinə nəzarətin gücləndirilməsi, saxta məhsullarla mübarizə, əczaçılıq bazarında şəffaflığın artırılması və göstərilən tibbi xidmətlərin keyfiyyətinin yüksəldilməsidir”.
Panel sessiyasında edilən çıxışlarda, həmçinin qeyd edilib ki, müasir texnologiyaların tətbiqi istehsalın səmərəliliyinin artırılması, keyfiyyətə nəzarətin gücləndirilməsi və rəqabətqabiliyyətli sənaye modelinin formalaşdırılmasına xidmət edir.
Tədbir çərçivəsində təqdim olunan inkişaf modeli əczaçılıq sənayesində yeni mərhələnin başlanğıcı kimi qiymətləndirilib. Qeyd edilib ki, bu model çərçivəsində cari ildən etibarən yerli istehsalın genişləndirilməsi planlaşdırılır və növbəti illərdə müxtəlif dərman preparatlarının istehlakçılara təqdim olunması gözlənilir.
Konfransın əsas məqsədi yalnız mövcud çağırışların müzakirəsi deyil, eyni zamanda, ixtisaslaşmış bilik və təcrübə, innovativ yanaşmalar, aktual məsələlər və suallar ətrafında fikir mübadiləsi aparmaq, yerli əczaçılıq sənayesinin inkişafına töhfə vermək olub. Bu yanaşma yerli istehsalçılar arasında əməkdaşlıq əlaqələrinin daha dinamik inkişafına və sənaye daxilində sinerjinin güclənməsinə xidmət edir.
Konfransın əsas istiqamətlərindən biri yerli istehsal prosesində uğur qazanmış ölkələrin təcrübəsinin öyrənilməsi olub. Bu məqsədlə Türkiyə Dərman və Tibb Cihazları Qurumu, Özbəkistanın Səhiyyə Nazirliyi yanında Əczaçılıq Sənayesinin İnkişafı Agentliyi, Qazaxıstanın Səhiyyə Nazirliyinin İnvestisiya Layihələri İdarəsi və Macarıstanın Semmelweis Universitetinin Sağlamlıq Xidmətlərinin İdarəedilməsi Təlim Mərkəzinin rəhbər nümayəndələri çıxış edərək təcrübələrini bölüşüblər.
Bölmənin digər xəbərləri
