AZƏRBAYCAN ERMƏNİSTANLA NƏTİCƏSİZ DANIŞIQLARA BMT TƏHLÜKƏSİZLİK ŞURASININ QƏTİ MÜDAXİLƏSİNƏ EHTİYAC GÖRÜR
ATƏT-in vasitəçiliyi ilə keçirilən Ermənistan-Azərbaycan danışıqlarında irəliləyişin olmadığını və vasitəçilərin erməni təcavüzünün nəticələri ilə, demək olar ki, barışmasını nəzərə alaraq, Azərbaycan tərəfi BMT Təhlükəsizlik Şurasının bu məsələyə qəti müdaxiləsinə ehtiyac görür. Ölkəmizin BMT-dəki daimi nümayəndəsi Yaşar Əliyev bunu noyabrın 21-də Baş Məclisin 57-ci sessiyasında bəyan etmişdir. Geniş iclasın gündəliyində duran “BMT, regional və digər təşkilatlarla əməkdaşlıq” məsələsi üzrə çıxış edən Azərbaycan nümayəndəsi xatırlatmışdır ki, bizim təşəbbüsümüz olan və beynəlxalq təşkilatların da dəstəklədiyi qismən həll variantını - zəbt etdiyi rayonların dördündən Ermənistanın silahlı qüvvələri çıxarması müqabilində Ermənistanı Azərbaycanla və regionun digər dövlətləri ilə birləşdirən dəmir yolunu açmaq haqqında təklifi Ermənistan tərəfi qəbul etməmişdir.
Səfir Yaşar Əliyev vurğulamışdır ki, ATƏT münaqişələrin həllində daha məsuliyyətli çıxış etməlidir. Bu baxımdan, Minsk qrupunun vasitəçiliyi qərəzsiz, ədalətli olmalı, ATƏT-in və BMT Təhlükəsizlik Şurasının qərarlarının birmənalı şəkildə yerinə yetirilməsinə yönəlməlidir.
Şəfər Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
