AZƏRBAYCAN GÜLƏŞ FEDERASİYASININ PLENUMU KEÇİRİLMİŞDİR

11.10.2006 [18:31]
Çap et
A⁺ A^-

AZƏRTAC xəbər verir ki, oktyabrın 11-də “Hyatt Recency” mehmanxanasında Azərbaycan Güləş Federasiyasının plenumu keçirilmişdir.

Tədbirdən əvvəl Milli Olimpiya Komitəsinin, Gənclər və İdman Nazirliyinin, federasiyanın nümayəndələri, veteran güləşçilər, məşqçi və idmançılar Fəxri xiyabana gedərək Azərbaycan xalqının ümummilli lideri Heydər Əliyevin xatirəsini ehtiramla yad etmiş, məzarı önünə əklil qoymuşlar.

Plenum iclasında dahi şəxsiyyət Heydər Əliyevin həyat və fəaliyyətini, ölkədə idmanın inkişafı sahəsində gördüyü işləri və qazanılmış uğurları əks etdirən “Sən bizimləsən” videolenti nümayiş etdirilmişdir. Azərbaycan Güləş Federasiyasının I vitse-prezidenti Cavanşir Qurbanov çıxış edərək, ümummilli liderimiz Heydər Əliyev tərəfindən Azərbaycanda idmanın güclü texniki bazasının yaradılmasından və hazırda dövlətimizin başçısı, Milli Olimpiya Komitəsinin prezidenti İlham Əliyevin bu uğurlu siyasəti layiqincə davam etdirməsindən danışmışdır.

İclasda bir sıra təşkilati məsələlər müzakirə edilmişdir. Federasiyanın İcraiyyə Komitəsinin üzvü, Milli Məclisin deputatı Aydın Abbasov səsvermə yolu ilə vitse-prezident vəzifəsinə seçilmişdir. Milli Məclisin deputatları Fuad Muradov, Əkrəm Abdullayev, Çingiz Əsədullayev və plenumun üzvü Rafael Bayramov federasiyanın İcraiyyə Komitəsinə üzv seçilmişlər. Yunan-Roma və sərbəst güləş üzrə yığma komandaların baş məşqçiləri bu il beynəlxalq turnirlərdə, Avropa və dünya çempionatlarında Azərbaycan pəhləvanlarının uğurlarından, eləcə də, bəzi idmançıların zəif çıxış etmələrinin səbəblərindən danışmışlar. Plenum ötən ay Çində keçirilən dünya çempionatında Rövşən Bayramovun gümüş, Namiq Abdullayevin bürünc medal qazanmasını yüksək qiymətləndirmiş, Elman Əsgərov və Xızar Durqayevin öz çəkilərində yarışların 8 ən güclü idmançısı sırasına düşməsini qənaətbəxş hesab etmişdir.

Plenumda gələn il Bakıda keçiriləcək dünya çempionatı ilə bağlı görülən işlərdən və Azərbaycan güləşçilərinin 2008-ci il Pekin Olimpiya Oyunlarına lisenziya qazanmaları üçün bu yarışda uğurla çıxış etmələrinin əhəmiyyətindən danışılmışdır. Ölkədə qadın və çimərlik güləşinin də inkişafı, məşqçi və hakimlərin ixtisasartırma kurslarında iştirakı və klub və cəmiyyətlərdə idmançıların peşəkarlığının artırılması üçün tədbirlər görülməsinin vacibliyi qeyd olunmuşdur.

İclasda Milli Olimpiya Komitəsinin vitse-prezidenti Xəzər İsayev iştirak etmişdir.