AZƏRBAYCAN HƏRBÇİLƏRİ ƏFQANISTANA YOLA DÜŞÜRLƏR
Noyarbın 18-də Müdafiə Nazirliyinin “N” hərbi hissəsində Azərbaycan Respublikası Silahlı Qüvvələrinin sülhməramlı taqımının Əfqanıstana yola salmasına həsr olunmuş mərasim keçirilmişdir.
Mərasimdə müdafiə naziri general-polkovnik Səfər Əbiyev çıxış edərək, Silahlı Qüvvələrimizin bölmələrinin sülhyaratma əməliyyatlarına qoşulmasının, beynəlxalq terrorizmə qarşı mübarizədə ölkəmizin fəal iştirakının Azərbaycan Prezidenti Heydər Əliyevin uğurlu xarici siyasətinin nəticəsi kimi respublikamızın dünyada nüfuzunun yüksəlməsi sayəsində mümkün olduğunu vurğuladı.
Azərbaycan ordusunun bu taqımının yaradılmasının respublikamız 1994-cü ildə NATO-nun “Sülh naminə tərəfdaşlıq” proqramına qoşulduqdan sonra mümkün olduğunu xatırladan nazir dedi ki, Milli Məclis noyabrın 15-də “Azərbaycan Respublikası Silahlı Qüvvələri taqımının Türkiyə Cümhuriyyəti Silahlı Qüvvələri taburu tərkibində və NATO strukturlarının ümumi komandanlığı altında Əfqanıstanda yerləşdirilməsinə və müvafiq əməliyyatlarda iştirak etməsinə razılıq verilməsi haqqında” qərar qəbul etmişdir. Biz sülhməramlı taqımımızın Əfqanıstandakı fəaliyyətini daim diqqət mərkəzində saxlayacağıq. Ümidvaram ki, Azərbaycan əsgərləri onlara həvalə olunmuş vəzifəni şərəflə yerinə yetirəcəklər.
Mərasimdə taqımın şəxsi heyətinə Azərbaycan Respublikasının Prezidenti, Ali baş komandan Heydər Əliyevin hədiyyələri - televizor, videomaqnitafon və fotoaparat təqdim olundu. Müdafiə naziri general-polkovnik Səfər Əbiyev əsgərlərin hər birinə qol saatı hədiyyə etdi.
Sülhməramlı taqım bu gün təyinat yerinə yola düşəcəkdir.
Bölmənin digər xəbərləri
