AZƏRBAYCAN İDMANÇILARI KUNQ-FU ÜZRƏ DÜNYA ÇEMPİONATINDA HEYRƏTAMİZ NƏTİCƏ GÖSTƏRMİŞLƏR
İtaliyanın Peruca şəhərində keçirilən kunq-fu üzrə dünya çempionatında Azərbaycan idmançıları yüksək nəticə göstərmişlər.
Azərbaycan Kunq-Fu Federasiyasının prezidenti Barat İsrafilov AZƏRTAC-a bildirmişdir ki, 63 ökədən 940 idmançının yarışdığı turnirdə respublikamız 16 idmançı ilə təmsil olunmuşdur.
Turnirdə federasiya prezidentindən tutmuş idmançılara qədər müxtəlif növlərdə mübarizə aparan Azərbaycan yığması ümumilikdə 14 medal qazanmışdır.
Tayçi-çuan üzrə yarışlarda Barat İsrafilov birinci yeri tutmuşdur. Peşəkar sanda yarışlarında qüvvəsini sınayan Ramil Allahverdiyev (55 kq) isə final qarşılaşmasında meydan sahibi İtaliya idmançısını məğlub edərək qızıl kəmərə sahib çıxmışdır.
Sandaçıların mübarizəsində Emil Hacıyev (55 kq), Tural Əliyev (65 kq), Güloğlan Cabbarov (90 kq-dan yuxarı) bütün rəqiblərinə qalib gələrək fəxri kürsünün ən yüksək pilləsinə qalxmışlar. Rəşad Həsənov (60 kq) gümüş, Babək Hüseynov (80 kq), Samit Bəşirov (90 kq) isə bürünc medallara layiq görülmüşlər.
Gənclər arasında Ceyhun Xalıqlı (40 kq) və Elgün Bəylərov (70 kq) hamıdan güclü olmuşlar. Yalnız finalda 
uduzan Elgün Səfərov (48 kq) ikinci yeri tutmuşdur.
İdmançılarımız “layt sanda” üzrə yarışlarda da fərqlənmişlər. Bu növdə Orxan Rəhimov (75 kq) və Anar Kərimov (80 kq) qızıl, Zaur Mövlanov isə (90 kq) gümüş medala sahib olmuşlar.
Ümumi komanda hesabında Azərbaycan yığması yalnız Rusiya idmançılarını özündən irəli buraxaraq ikinci yeri tutmuşdur. İtaliya yığması isə üçüncü olmuşdur.
Bölmənin digər xəbərləri
