Azərbaycan ilə Beynəlxalq Qızıl Xaç Komitəsi arasında əməkdaşlıq məsələləri müzakirə olunub
Bakı, 17 iyun, AZƏRTAC
İyunun 17-də Ailə, Qadın və Uşaq Problemləri üzrə Dövlət Komitəsinin sədri Bahar Muradovanın Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri Elena Ajmone Sessera ilə onlayn görüşü keçirilib.
Dövlət Komitəsindən AZƏRTAC-a bildiriblər ki, görüşdə Komitənin sədr müavinləri Sədaqət Qəhrəmanova və Aynur Sofiyeva, BQXK-nın Müdafiə işləri üzrə koordinatoru Emanuela Bertingi, Ailə əlaqələrinin bərpası üzrə məsul şəxs Turana Bağırova və Komitənin bir qrup əməkdaşı iştirak edib.
Onlayn görüş çərçivəsində BQXK-nın münaqişə zonalarında olan Azərbaycan vətəndaşlarının işləri ilə bağlı həyata keçirdiyi fəaliyyətlər və BQXK-nın Azərbaycan Respublikası Hökuməti və Komitə ilə əməkdaşlığı, COVID-19 ilə bağlı cavab tədbirləri və digər məsələlər müzakirə olunub.
BQXK ilə ikitərəfli faydalı əməkdaşlığı yüksək qiymətləndirən Bahar Muradova birgə həyata keçirilən layihələrin önəmini qeyd edib. O, azərbaycanlı uşaqların münaqişə zonalarından ölkəmizə gətirilməsinin vacibliyini vurğulayaraq, bu işdə göstərilən dəstəyə görə minnətdarlığını ifadə edib. Münaqişələrin baş verdiyi ölkələrdə yaşayan ailələrdə doğulan uşaqların həyatlarının ağır dönəmlərini yaşadıqlarını vurğulayan Komitə sədri deyib: “Müharibələr itkilər və dağıntılar deməkdir. Bu fəlakətlərin mərkəzində daha çox uşaq və qadınların olması dözülməzdir. Bu istiqamətdə BQXK bütün tərəfdaşları ilə birlikdə çox səmərəli fəaliyyət göstərib. Azərbaycan hökuməti BQXK-nın bütün dünyada müharibələrdən əziyyət çəkən uşaqların vəziyyətlərinin yaxşılaşdırılması istiqamətindəki təşəbbüslərini alqışlayaraq müvafiq dəstəyi verib”.
Bahar Muradova diqqətə çatdırıb ki, ölkəmizə gətirilən azərbaycanlı uşaqların cəmiyyətə reinteqrasiyası, onların səhiyyə və təhsil xidmətlərinə cəlb edilməsi, sosial və psixoloji reabilitasiyası istiqamətində bu günədək aparılan işlər təqdirəlayiqdir. Ötən dövr ərzində dövlət qurumlarından ibarət işçi qrupu tərəfindən uşaqların təhlükəsizliyi təmin edilib və hüquqlarının müdafiəsi istiqamətində müvafiq xidmətlər göstərilib. Komitə əməkdaşları da bu işə cəlb edilərək, öz səlahiyyətləri çərçivəsində uşaqların psixoloji və sosial xidmətlərlə təmin edilməsi istiqamətində fəaliyyət göstəriblər. “Bu proses bu gün də davam etməkdədir. Komitə nümayəndələri hazırkı çətin dönəmdə - pandemiya dövründə daim ailələrin yanında olub, psixoloqlar və sosial işçilər davamlı olaraq bu ailələr və uşaqlar ilə əlaqə saxlayaraq, onların ehtiyaclarının müəyyən edilməsi istiqamətində fəaliyyətlərini davam etdirirlər”, - deyə o bildirib.
Daha sonra çıxış edən Beynəlxalq Qızıl Xaç Komitəsinin (BQXK) ölkəmizdəki nümayəndəliyinin rəhbəri Elena Ajmone Sessera münaqişə bölgələrində olan azərbaycanlı uşaqların ölkəyə qaytarılması istiqamətində görülən işlərə görə Azərbaycan dövlətinə və Komitəyə təşəkkürünü bildirib, göstərilən hər bir dəstəyin mühüm əhəmiyyət kəsb etdiyini vurğulayıb. E.Sessera son illər ərzində bu sahədə görülmüş işlər, baş vermiş irəliləyişlər və cari dinamika haqqında məlumatları diqqətə çatdırıb. O, humanitar və sosial ehtiyacları qeyd edərək, bu qəbildən olan ailələrin cəmiyyətə inteqrasiyası, ailə münasibətlərinin bərpası, sosial və psixoloji dəstək, təhsil və səhiyyə xidmətlərinə çıxış imkanları sahəsində görülən işlər haqqında danışıb.
Görüş çərçivəsində münaqişələrdən əziyyət çəkən uşaqlarla bağlı görülən işlərin bundan sonra da davam etdirilməsi və bu istiqamətdə yeni layihələrin və tədbirlərin görülməsi istiqamətində fikir mübadiləsi aparılıb.
Bölmənin digər xəbərləri
