AZƏRBAYCAN İLƏ MİSİR ARASINDA MÜHÜM SƏNƏDLƏR İMZALANMIŞ VƏ PARAFLANMIŞDIR
Nazir H.Babayev Azərbaycan Respublikasının Baş naziri Artur Rasizadənin misirli həmkarını ölkəmizə səfərə dəvət etməsi barədə məktubu Baş nazir Əhməd Nazifə təqdim etmişdir. Baş nazir dəvəti məmnuniyyətlə qəbul etdiyini, səfərin tezliklə həyata keçiriləcəyini bildirmişdir.
Həmin gün nazir H.Babayev Misirin ticarət və sənaye naziri Rəşid Məhəmməd Rəşid ilə görüşmüşdür. Görüşdə Azərbaycan ilə Misir arasında iqtisadi və ticarət əməkdaşlığının inkişafı, Misirin işgüzar dairələrinin nümayəndələri, iş adamları və sərmayədarlarının respublikamızın sosial-iqtisadi inkişaf layihələrində iştirakı məsələləri ərtafında fikir mübadiləsi aparılmışdır. Eyni zamanda Azərbaycanda və Misirdə keçirilən ixtisaslaşdırılmış beynəlxalq sərgilərdə tərəflərin iştirakı məsələləri, neft və qaz sahəsində birgə layihələrin həyata keçirilməsi imkanları, hər iki ölkənin mövcud qanunvericiliyi çərçivəsində iş adamları tərəfindən iqtisadiyyat sahəsinə, xüsusilə də turizm sahəsinə qarşılıqlı sərmayə qoyuluşu əsas müzakirə mövzuları olmuşdur. Nazir H.Babayev Rəşid Məhəmməd Rəşidi Azərbaycana dəvət etmişdir. Dəvət məmnuniyyətlə qəbul edilmişdir.
Nazir H.Babayev İqtisadi və Elmi-Texniki Əməkdaşlıq üzrə Azərbaycan-Misir Müştərək Komissiyasının III toplantısının 2006-cı ildə Bakıda keçiriləcəyini nazir Rəşid Məhəmməd Rəşidin diqqətinə çatdırmış və həmin toplantıda səhiyyə sahəsində misirli iş adamlarının iştirakının təmin olunmasını xahiş etmişdir.
Misirin sərmayələr naziri Mahmud Muhyiddinlə görüşən H.Babayev, Azərbaycanda mövcud iqtisadi durum, əlverişli sərmayə mühiti, həmçinin hazırda Azərbaycan-Rusiya, Azərbaycan-Gürcüstan-Türkiyə və Azərbaycan-İran istiqamətlərində həyata keçirilən irimiqyaslı avtomobil və dəmir yolu layihələri barədə ətraflı məlumat vermiş, Mahmud Muhyiddini ölkəmizə səfərə dəvət etmişdir.
Azərbaycan nümayəndə heyəti MƏR Mədəniyyət Nazirliyinin dəvəti ilə Misirin qədim tarixi abidələrindən biri – “Məhəmməd Əli qalası”nın yeni təmirindən sonra açılışında iştirak etmişdir.
Daha sonra iqtisadi inkişaf naziri Heydər Babayev və Misirin beynəlxalq əməkdaşlıq naziri Faizə Əbu Ən-Nəqənin iştirakı ilə “Azərbaycan Respublikası Maliyyə Nazirliyi və Misir Ərəb Respublikası Maliyyə Nazirliyi arasında əməkdaşlıq haqqında Saziş”, “Azərbaycan Respublikası İqtisadi İnkişaf Nazirliyi ilə Misir Ərəb Respublikası Xarici Ticarət Nazirliyinin Misir Beynəlxalq Ticarət Mərkəzi arasında Anlaşma Memorandumu”, “Azərbaycan Respublikası və Misir Ərəb Respublikası arasında səhiyyə və farmasiya sahələrində əməkdaşlığa dair Anlaşma Memorandumu” və “İqtisadi və Elmi-Texniki Əməkdaşlıq üzrə Azərbaycan-Misir Müştərək Komissiyası”nın II iclasının Protokolu” imzalanmışdır. Həmçinin “Azərbaycan Respublikası Hökuməti və Misir Ərəb Respublikası Hökuməti arasında turizm sahəsində əməkdaşlıq haqqında Anlaşma Memorandumu” və “Azərbaycan Respublikası Hökuməti və Misir Ərəb Respublikası Hökuməti arasında gənclərlə iş və idman sahəsində əməkdaşlıq haqqında Saziş” paraflanmışdır.
Sonra mətbuat konfransı keçirilmiş, jurnalistlərə imzalanmış və paraflanmış sənədlər barədə ətraflı məlumat verilmişdir.
Bununla da, İqtisadi və Elmi-Texniki Əməkdaşlıq üzrə Azərbaycan-Misir Müştərək Komissiyasının II iclası başa çatmışdır.
Azərbaycan nümayəndə heyəti dekabrın 26-da vətənə yola düşmüşdür.
Bölmənin digər xəbərləri
