AZƏRBAYCAN İLƏ MİSİR ARASINDA SAZİŞ İMZALANMIŞDIR
Martın 2-də Nazirlər Kabinetində Azərbaycan Respublikası və Misir Ərəb Respublikası hökumətləri arasında informasiya-mədəniyyət mərkəzlərinin təsisi və fəaliyyət şərtləri haqqında saziş imzalanmışdır. Sənədi Azərbaycan tərəfindən Baş nazirin müavini Elçin Əfəndiyev, qarşı tərəfdən isə Misirin ölkəmizdəki fövqəladə və səlahiyyətli səfiri Yusif Əhməd İbrahim əl-Şərqavi imzalamışlar.
Sənədə görə, Bakıda və Qahirədə açılacaq informasiya-mədəniyyət mərkəzlərinin əsas vəzifəsi humanitar, elmi-texniki, mədəniyyət və informasiya sahələrində proqramların həyata keçirilməsindən ibarətdir. Qarşılıqlı razılaşmaya görə, hər iki ölkənin digər şəhərlərində də mərkəzlərin filialları açıla bilər.
İmzalama mərasimindən əvvəl çıxış edən Baş nazirin müavini Elçin Əfəndiyev və səfir Yusif Əhməd İbrahim əl-Şərqavi əsası Azərbaycan Prezidenti Heydər Əliyev və Misir Prezidenti Məhəmməd Hüsni Mübarək tərəfindən qoyulmuş Azərbaycan-Misir əlaqələrinin genişlənməsində informasiya-mədəniyyət mərkəzlərinin əhəmiyyətini diqqətə çatdırmışlar.
Bölmənin digər xəbərləri
