AZƏRBAYCAN İLƏ TÜRKİYƏ ARASINDA DİPLOMATİK ƏLAQƏLƏRİN 10 İLLİYİNƏ HƏSR OLUNMUŞDUR
Azərbaycanda Atatürk Mərkəzi ölkəmizlə Türkiyə arasında diplomatik əlaqələrin 10 illiyi münasibətilə yanvarin 14-də Milli Elmlər Akademiyası Rəyasət heyətinin binasında elmi-praktik konfrans təşkil etmişdir.
Atatürk Mərkəzinin müdiri, AMEA-nın müxbir üzvü, Nizami Cəfərov konfransı açaraq bildirdi ki, ötən on ildə dünyada, eləcə də Azərbaycanda və Türkiyədə baş vermiş proseslər qardaş ölkələrimiz arasında diplomatik əlaqələrin sürətlə inkişafını şərtləndirmişdir.
Azərbaycanla Türkiyənin eyni bir xalqın eyni bir etnik - mədəni sistemə malik iki dövləti olduğunu, ölkələrimiz arasında diplomatik əlaqələrin də məhz bu səviyyədə qurulduğunu vurğulayan natiq dedi ki, dövlət rəhbərlərinin keçirdikləri müxtəlif görüşlərdə Azərbaycan- Türkiyə əlaqələri həmişə öndə olmuşdur. Dəfələrlə bildirilmişdir ki, qardaş dövlətlərimiz arasındakı əlaqələrin hərtərəfli inkişafı ölkələrimiz üçün olduqca vacib, həyati əhəmiyyətlidir və beynəlxalq fəaliyyətimizin əsasını təşkil edən münasibətlərdir.
Sonra Türkiyənin ölkəmizdəki səfiri Ünal Çeviköz, Azərbaycanın xarici işlər naziri Vilayət Quliyev və Prezidentin İcra Aparatının xarici əlaqələr şöbəsinin müdiri Novruz Məmmədov çıxış etdilər.
Ötən on ildə ölkələrimiz arasında diplomatik əlaqələrin möhkəm və sağlam təməl üzərində formalaşdığını vurğalayan natiqlər Azərbaycanın öz müstəqilliyini qoruyub saxlamasında, beynəlxalq aləmdə tanınmasında qardaş Türkiyənin dəstəyindən danışdılar, konfransa öz işində uğurlar arzuladılar.
Konfransda Türkiyənin keçmiş diplomatı, professor Bilal Şimişirin “Türkiyə-Azərbaycan diplomatik əlaqələrinin qurulması tarixindən”, respublika İqtisadi İnkişaf Nazirliyinin İqtisadi İslahatlar Mərkəzinin direktoru, professor Rasim Həsənovun “Azərbaycan- Türkiyə iqtisadi əlaqələrinin bu günü və gələcəyi”, Avrasiya Strateji Araşdırmalar Mərkəzinin direktoru, doktor Yaşar Kalafatın “Son on ildə Türkiyə-Azərbaycan münasibətlərinin sosial mədəni xüsusiyyətləri”, xarici işlər nazirinin müavini Araz Əzimovun “Azərbaycan ilə Türkiyə arasında hərbi və təhlükəsizlik sahələrində əməkdaşlıq” mövzularında məruzələri dinlənildi.
Sonra məruzələr ətrafında müzakirələr oldu.
Səfir Ü.Çeviköz professor N.Cəfərov yekun sözü söylədilər.
Bölmənin digər xəbərləri
