Azərbaycan ilə UNİCEF arasındakı əməkdaşlığın inkişaf səviyyəsindən məmnunluq ifadə olunmuşdur
Bakı, 10 iyun (AZƏRTAC). İyunun 10-da Azərbaycan Respublikasının xarici işlər naziri Elmar Məmmədyarov fəaliyyətinin başa çatması ilə əlaqədar BMT-nin Uşaq Fondunun (UNİCEF) ölkəmizdəki nümayəndəliyinin rəhbəri Mark Herevard ilə görüşmüşdür.
Xarici İşlər Nazirliyinin mətbuat xidmətindən AZƏRTAC-a bildirmişlər ki, görüşdə Azərbaycan ilə UNİCEF arasındakı əməkdaşlığın inkişaf səviyyəsindən məmnunluq ifadə olunmuşdur. Tərəflər bu əməkdaşlığın bundan sonra da davam etdirilməsi üçün geniş imkanların olduğunu qeyd etmişlər.
Nazir Elmar Məmmədyarov Azərbaycan ilə UNİCEF arasında əməkdaşlığın inkişafına verdiyi töhfəyə görə Mark Herevarda təşəkkür etmiş və ona gələcək fəaliyyətində uğurlar arzulamışdır.
Mark Herevard Azərbaycanda onun fəaliyyəti üçün yaradılmış şəraitə görə minnətdarlığını bildirmiş və ölkəmizdən xoş təəssüratla ayrıldığını qeyd etmişdir.
Bölmənin digər xəbərləri
