Azərbaycan Könüllü Təşkilatları İttifaqı təsis edilib
Bakı, 20 avqust, AZƏRTAC
Ölkəmizdə könüllülük hərəkatının daha geniş vüsət alması və səmərəliliyinin gücləndirilməsi məqsədilə Azərbaycan Könüllü Təşkilatları İttifaqının təsis konfransı keçirilib.
İttifaqdan AZƏRTAC-a bildiriblər ki, qurumun yaradılması Azərbaycan Prezidenti İlham Əliyevin çağırışına cavab olaraq koronavirus (COVID-19) infeksiyasının ölkəmizdə yayılmasının və onun törədə biləcəyi fəsadların qarşısının alınması məqsədilə dövlət tərəfindən atılan bütün zəruri addımlara töhfə vermək məqsədilə formalaşdırılmış və bu müddət ərzində səmərəliliyini sübut etmiş Azərbaycan Könüllülərinin Əlaqələndirmə Mərkəzinin keyfiyyətcə yeni mərhələyə qədəm qoyması zərurətindən və sosial sifarişdən irəli gəlir. Məhz bu zərurətdən çıxış edərək könüllü hərəkat və təşkilatlarının təşəbbüsü ilə artıq Mərkəzin hüquqi şəxs olaraq qeydiyyatdan keçirilməsi məqsədəuyğun hesab edilib.
İttifaqın missiyası Azərbaycanda könüllülük hərəkatının inkişafı üçün münbit şəraitin yaradılmasına dəstək vermək, milli-mənəvi dəyərlərimizə və ənənələrimizə yaxın olan könüllülüyün Azərbaycanda gündəlik həyat normasına çevrilməsinə nail olmaqdır. İttifaqın məqsədləri kimi ölkəmizdə könüllü fəaliyyətinin təşkilatçılarının əlaqələndirilməsi və ictimai faydalı fəaliyyətlərin təşkili üçün səylərinin birləşdirilməsi, könüllülük sahəsində sektorlararası əməkdaşlığın möhkəmləndirilməsi, könüllü təşkilatlarına təşkilati, hüquqi, məsləhət, məlumat və s. dəstəyin göstərilməsi, İttifaqın iştirakçılarının mənafelərinin dövlət qurumları qarşısında təmsil və müdafiə edilməsi, könüllü təşkilatları və dövlət qurumları arasında körpü rolunun oynanılması, könüllülüyün təşviqi və təbliği, könüllülük sahəsində beynəlxalq (ikitərəfli və çoxtərəfli) əməkdaşlığın qurulması, beynəlxalq təcrübənin öyrənilməsi və Azərbaycanın təcrübəsinin dünyada təşviqi müəyyən olunub.
Azərbaycan Könüllü Təşkilatları İttifaqı fəaliyyətini dövlət qurumları və yerli özünüidarəetmə orqanları, maraqlı dövlət və bələdiyyə müəssisələri, qeyri-hökumət təşkilatları və eyni zamanda digər könüllü fəaliyyətinin təşkilatçıları, gənclərlə iş sahəsinin iştirakçıları, biznes və ictimaiyyət nümayəndələri ilə sıx əməkdaşlıq şəraitində qurmağı nəzərdə tutur.
Təsis konfransında İttifaqın nizamnaməsi təsdiqlənib və onun dövlət qeydiyyatına alınması ilə bağlı Ədliyyə Nazirliyinə müraciət edilməsi barədə qərar qəbul olunub. Keçirilən səsvermə nəticəsində İttifaqın idarə heyətinin və mərkəzi nəzarət təftiş komissiyasının tərkibi də müəyyən edilib. Tural Hümbətov növbəti bir il ərzində İttifaqın sədri, Canoğlan İlyasov və Ruslan Mirzəliyev isə sədr müavinləri seçiliblər.
Azərbaycan Könüllü Təşkilatları İttifaqının üzvləri “ASAN Könüllüləri” Təşkilatı, “Regional İnkişaf” İctimai Birliyi, “Bir Könüllü” Tələbələrin Əməkdaşlığı İctimai Birliyi, “Könüllü DOST” Proqramı, “Aqrar İnkişaf Könüllüləri” İctimai Birliyi, “Nəqliyyat Könüllüləri” Proqramı, “Formula 1 Azərbaycan Qran-Prisi” Könüllülük Proqramı, “Miqrasiya Könüllüsü” İctimai Birliyi, “Könüllü gömrükçü” Dəstəsi, “Turizm Könüllüləri” Təşkilatı, “Ekokönüllüləri” Qrupu, “AFFA və Avro-2020” Könüllülər Proqramı, "Diplomatiya Könüllüləri" Qrupu, “Gənc Könüllülər” Hərəkatı, "Azərbaycan Diaspor Könüllüləri" Proqramı, "SƏLİS Könüllüləri" İctimai Birliyi, "Ədliyyə Könüllüləri" İctimai Birliyi, "Könüllü Qida Nəzarətçisi" Proqramıdır.
Bölmənin digər xəbərləri
