Azərbaycan MDB məkanında birliyi, qarşılıqlı etimadı və sülhü gücləndirən təşəbbüslərin fəal iştirakçısıdır - RƏY
Bakı, 13 oktyabr, AZƏRTAC
Azərbaycanın apardığı çoxvektorlu və balanslı xarici siyasət bu gün ölkəmizin beynəlxalq aləmdə qazandığı nüfuzun, etimadın və etibarlılığın əsas dayağına çevrilib. Son günlərdə Prezident İlham Əliyevin iştirak etdiyi beynəlxalq və regional təşkilatların tədbirləri bu siyasətin növbəti təzahürü kimi diqqət çəkir. Hər bir tədbirdə Azərbaycanın rolu, çıxış etdiyi mövqelər və irəli sürdüyü təşəbbüslər bir daha göstərdi ki, ölkəmiz fərqli coğrafi məkanlarda yerləşən, siyasi baxımdan bir-birinə zidd, lakin əməkdaşlıq baxımından perspektivli qurumlarla eyni anda qarşılıqlı etimada əsaslanan münasibətlər qura bilir.
Bu sözləri AZƏRTAC-a açıqlamasında Milli Məclisin deputatı Pərvanə Vəliyeva deyib.
O bildirib ki, bu, Prezident İlham Əliyevin diplomatik çevikliyinin və strateji uzaqgörənliyinin göstəricisidir. Azərbaycan bu gün həm Avropa İttifaqı, həm Türk Dövlətləri Təşkilatı, həm də MDB üçün etibarlı tərəfdaş sayılır. Ölkəmiz bu təşkilatların hər biri ilə öz milli maraqlarına uyğun şəkildə əməkdaşlıq edir və bütün platformalarda regionun sülh, sabitlik və inkişaf gündəliyini irəli sürür. Bu siyasət Azərbaycanın heç bir blok qarşıdurmasına qoşulmadan, amma, eyni zamanda, bütün tərəflərlə konstruktiv dialoq qura bilməsinin bariz nümunəsidir. Prezident İlham Əliyevin beynəlxalq tədbirlərdə iştirakı həm də bu siyasətin canlı ifadəsidir. Onun regional və qlobal platformalarda çıxışları Azərbaycanın maraqlarını dəqiq və prinsipial şəkildə ifadə edir, ölkəmizi etibarlı tərəfdaş və fəal oyunçu kimi möhkəmləndirir. Azərbaycan artıq beynəlxalq münasibətlər sistemində gündəlik formalaşdıran, təşəbbüs irəli sürən aktor kimi çıxış edir. Bu uğurların əsasını həm də Azərbaycanın həyata keçirdiyi uğurlu iqtisadi diplomatiya təşkil edir. Enerji, nəqliyyat və logistika sahəsində həyata keçirilən irimiqyaslı layihələr – Cənub Qaz Dəhlizi, Bakı–Tbilisi–Qars dəmir yolu, Zəngəzur dəhlizi – TRIPP yolu və digər regional təşəbbüslər sayəsində Azərbaycanı Mərkəzi Asiya+Cənubi Qafqaz regionunda həm iqtisadi, həm də geosiyasi baxımdan aparıcı gücə çevirib.
Milli Məclisin deputatı qeyd edib ki, oktyabrın 10-da Tacikistanın paytaxtı Düşənbədə keçirilən MDB Dövlət Başçıları Şurasının məhdud tərkibdə iclasında Prezident İlham Əliyev çıxış edərək bir sıra mühüm məsələlərə toxunub. Dövlətimizin başçısının çıxışı Azərbaycan-Tacikistan münasibətlərinin möhkəmlənməsi, MDB məkanında dostluq və əməkdaşlığın dərinləşməsi, eləcə də Azərbaycanın regional mədəni və idman təşəbbüslərinin əhəmiyyətinə dair önəmli mesajlarla yadda qalıb. Prezident İlham Əliyev çıxışında MDB dövlət başçılarına minnətdarlığını bildirərək Azərbaycanın Şərqi Zəngəzur bölgəsinin Laçın şəhərinin 2024-cü ildə MDB-nin mədəniyyət paytaxtı kimi seçilməsini yüksək qiymətləndirib. Prezident İlham Əliyev Birliyin humanitar həyatında mühüm hadisə olan III MDB Oyunlarının Azərbaycanın qədim mədəniyyət mərkəzi Gəncə şəhərində və ölkənin daha altı şəhərində – Qəbələ, Göygöl, Yevlax, Mingəçevir, Xankəndi və Şəkidə keçirildiyini xüsusi vurğulayıb. Belə ki, bu yarışlarda 13 ölkədən – həm MDB üzvləri olan, həm də qonaq dövlətlərdən 1600-dən çox idmançı iştirak edib. Bu qəbildən tədbirlər MDB məkanında və onun hüdudlarından kənarda dostluğu, əməkdaşlığı möhkəmləndirir, bərabərhüquqlu, qarşılıqlı hörmətə və etimada əsaslanan münasibətlərin güclənməsinə kömək edir. Gəncədə və digər şəhərlərdə keçirilən bu oyunlar Azərbaycan idman infrastrukturunun gücünü nümayiş etdirməklə yanaşı, MDB ölkələri arasında mədəni və humanitar əlaqələrin daha da yaxınlaşmasına mühüm töhfə verdi.
“Prezident İlham Əliyevin Düşənbədəki çıxışı MDB ölkələri arasında mehriban qonşuluq, dostluq və qarşılıqlı hörmət prinsiplərinin möhkəmlənməsinə yönəlmiş ardıcıl siyasətin təzahürü oldu. Dövlətimizin başçısının humanitar, mədəni və idman əməkdaşlığına dair mesajları bir daha göstərdi ki, Azərbaycan MDB məkanında birliyi, qarşılıqlı etimadı və sülhü gücləndirən təşəbbüslərin fəal iştirakçısıdır. Gəncədə keçirilən III MDB Oyunları və Laçının mədəniyyət paytaxtı seçilməsi bu siyasətin uğurlu nəticələridir. Azərbaycan diplomatiyası bu gün balanslı siyasət yürütməklə yalnız regional sabitliyə deyil, həm də qlobal təhlükəsizlik sisteminə töhfə verir. Prezident İlham Əliyevin rəhbərliyi ilə formalaşan bu çoxvektorlu siyasət Azərbaycanın beynəlxalq mövqeyini gücləndirib, ölkəmizi Cənubi Qafqaz və Mərkəzi Asiya regionlarının əməkdaşlıq mərkəzi kimi ön plana çıxarıb”, - deyə P.Vəliyeva vurğulayıb.
Bölmənin digər xəbərləri
