Azərbaycan millisinin baş məşqçisi: Avropa Gümüş Liqasında gözəl oyun göstərib, qalib gəlməyə çalışacağıq
Bakı, 22 may, AZƏRTAC
Avropa Gümüş Liqasına hazırlıqlarımız davam edir.
AZƏRTAC xəbər verir ki, bu sözləri kişi voleybolçulardan ibarət Azərbaycan millisinin baş məşqçisi Fərid Cəlalov hazırlıq prosesi ilə bağlı federasiyanın rəsmi saytına açıqlamasında deyib.
O, rəqibləri analiz etdiklərini söyləyib: “Oyunlarımızın başlamasına az vaxt qalıb. İlk oyunlarımız İsveç və Gürcüstan milliləri ilə səfərdə olacaq. Düşünürəm ki, istədiyimiz oyunu göstərə bilsək, qalib gələ bilərik. Əlbəttə, rəqiblərimiz arasında daha təcrübəli komandalar da var. Bu il heyətimizə təcrübəli oyunçularla yanaşı, gənclərimizi də cəlb etmişik. Bir neçə əsas voleybolçumuz isə zədə səbəbindən oyunlarda iştirak edə bilməyəcək. Çalışmalıyıq ki, hər bir matçda gözəl oyun göstərək və qalib gələk”.
Qeyd edək ki, millimiz Avropa Gümüş Liqasında ilk oyunlarını iyunun 6-da və 8-də İsveçdə keçirəcək. Rəqiblər meydan sahibi və Gürcüstan komandası olacaq. İkinci tur iyunun 13-15-də Bakıda təşkil olunacaq. Yığma burada Lüksemburq və Macarıstan yığmaları ilə qarşılaşacaq. İyunun 20-22-də Farer adalarında təşkil olunacaq son turda isə millimiz ev sahibi ilə yanaşı, Avstriya yığmasına qarşı da oynayacaq.
Bölmənin digər xəbərləri
