AZƏRBAYCAN NÜMAYƏNDƏ HEYƏTİ AŞPA-NIN YAY SESSİYASINDA İŞTİRAK EDƏCƏKDİR
Milli Məclisin Avropa Şurası Parlament Assambleyasındakı daimi nümayəndə heyətinin rəhbəri, millət vəkili İlham Əliyevin başçılığı ilə deputatlarımız AŞPA-nın yay sessiyasında iştirak etmək üçün iyunun 23-dən 29-dək Strasburqda səfərdə olacaqlar.
Nümayəndə heyətinin tərkibinə Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov, deputatlardan Gültəkin Hacıyeva, Nairə Şahtaxtinskaya, Qulamhüseyn Əlibəyli, Vaqif Vəkilov, Əli Hüseynov, Rəfael Hüseynov, Nazim İbrahimov, Elman Məmmədov və Milli Məclis Aparatının beynəlxalq münasibətlər şöbəsinin müdiri Azər Qasımov daxildirlər.
Sessiyada Şuşa rayon icra hakimiyyətinin başçısı Nizami Bəhmənov, icra hakimiyyəti başçısının Şuşa şəhəri üzrə nümayəndəsi Vaqif Hüseynov və hazırda Bakıda fəaliyyət göstərən Şuşa şəhəri 1 nömrəli məktəbin direktoru Sevil Babayeva da iştirak edəcəklər.
Yay sessiyasında Cənubi Qafqaz ölkələrində qaçqın və məcburi köçkünlərin vəziyyəti, Avropa Yenidənqurma və İnkişaf Bankının Mərkəzi və Şərqi Avropa ölkələrinin iqtisadi inkişafına töhfəsi, Avropa təsisatları arasında əməkdaşlığın perspektivləri və başqa məsələlər müzakirə olunacaqdır.
Deputatlarımız müzakirəyə çıxarılacaq məsələlərə Azərbaycan tərəfinin mövqeyini bildirəcək, qeyd və təkliflərini verəcəklər.
Milli Məclisin
Mətbuat xidməti
Bölmənin digər xəbərləri
