AZƏRBAYCAN OLİMPİYAÇILARI VƏTƏNƏ QAYITDILAR
Milli geyimli uşaqlar idmançılara gül-çiçək dəstələri təqdim etdilər.
Olimpiyaçılar jurnalistlərlə söhbətlərində idmançılara daim qayğı göstərdiklərinə, Olimpiadaya hazırlıq işlərini ən yüksək səviyyədə təşkil etdiklərinə görə Azərbaycan Prezidenti, ölkəmizin Milli Olimpiya Komitəsinin Prezidenti İlham Əliyevə, Gənclər, İdman və Turizm Nazirliyinin, idman federasiyalarının rəhbərlərinə, öz məşqçilərinə minnətdarlıqlarını bildirdilər. Onlar eyni zamanda qeyd etdilər ki, Afinada olarkən Azərbaycan vətəndaşlarının dəstəyini daim hiss edirdilər. Olimpiya çempionu Fərid Mansurov dedi ki, oyunlarda püşkatma nəticəsində o, güclü rəqiblərlə görüşməli olmuşdur. Onların arasında Olimpiya və dünya çempionları da var idi. Lakin onlara qalib gəlib yarımfinala çıxanda öz qüvvəmə inandım və məndə qələbəyə inam hissi yarandı.
Xatırladaq ki, Azərbaycanın Olimpiya yığma komandası bir qızıl və dörd bürünc medal qazanaraq, Afinada 202 iştirakçı ölkə arasında komanda hesabında 50-ci, medalların sayına görə isə 37-ci yeri tutmuşdur. Azərbaycan MDB ölkələri arasında 5-ci yerə çıxmışdır.
